A ! biensir mwin l’avé lir dann laktyalité Zétazini l’avé anvoye toute in flote bato d’guèr dann la mèr zantiye é mèm in pé pli ba o zalantour L’amérik di sid. Zot i pé rogarde dsi in karte oussa larmé amérikène i sorte é oussa li la parti pou agrèss lo Vénézuéla… Lo bi lété soidizan d’arète in kou avèk lo trafik la drog é sé pou sa dopi kék somenn kan bann zamérikin i oi in pti bato zot i koul pars zot i panss l’apré trafik la drog mé dann ka lo Vénézuèla sé kékshoz i tien pa d’boute, in bob anpliss é in promèss mové nouvèl pou bann vénézuélien.

Lo bi lété sinploman konm ni oi zordi d’okipe lo péi épi d ’ranplass lo gouvèrnman sossyaliss par in gouvèrnman d’droite mé atanssion avèk Trump nou lé zamé loin par rapor lé zafèr é rouvèr nouvo shantyé pou bann milyardèr sa i doizète kékshoz i trote dann son tète é sa sé in n’afèr i grossi zour an zour ziska ariv in rézilta monstré.. Zot i rapèl son lidé instal in rivyéra dann la bande Gaza ? Dsi in simtyèr bann milyé é milyé d’paléstinien. La pankor fé mé li la pankor rononssé.

Sirésèrtin dann inn-dé zour nou va aprann li néna in mové lintanssion pou lo Vénézuèla é lé pa sir bann droite lo péi nora pwin pou morde zot doi kan zot va oir bann zintanssion kolonyaliss épi inpèryaliss. Lo droi dé pèp i vo pa pliss in bonbon lorio pou zétazini é son bann milyardèr.

Si zot i lir témoignages zot i koné déza koman Cuba lé mal trété, koman Canada lé ménassé, é koman zétazini i vé konfisk lo groenland téritoir Danemark. Arzout èk sa lo prézidan i vé ankor kraz èk son pyé lo droi bann zamérikin zot mèm… Biensir sé kékshoz i fé mal lo droi bann pèp mé ziskakan sa v’alé konmsa.

Pars si zétazini final de konte lété arienk in tig an papyé konm Mao téi di souvan défoi ?a bon antandèr salu !

Justin