2010 nou la pass prosh, té falé zis in kal bérnik bann sosyalis pou fé déray nout prozé tram-trin. Ni kont pi lo tan nou la pèrd, é la zordi shakinn i roprann pou li lo prozé. Mi di ta mié pou nou. Byin sir zot i di pa lo tram-trin, pou zot, si i di tram-trin sa i vé dir zot la ropran nout prozé 2010, lo prozé Paul. Pou désertin i apèl sa “lo monoray“ pou dot i nonm “lo trin ésprèss rényoné“. Boudikont pou inn konm pou lot sé lo trin minm, mé pou fé konm si sé zot prozé, inn i pinn an blé, inn i pinn an maron é lot i pinn an roz.

Mé kisa lavé la vizyon pou war sa an promié ? Dan la tèt kisa i sort ? Kisa la rouv lo santié tram-trin avan tout ? Kisa néna prozé pou vréman pou dévlop nout péi ? Zordi na pwin inn i pé romèt an koz nout prozé tram-trin, sinon pou di i mank in boulon par isi, ou sinonsa pou di pinn lo sofa blé, tousala sé ryink détay. Sak i kont é sé sak listwar i rotyin, sék konm tou lo tan, nout parti èk son bann dirizan i wa pli lwin ké tout é sirtou, i wa avan tout.

Lé vré, kiswa pou lagrikiltir, kiswa pou lékol, kiswa pou lo dévlopman nout péi an zénéral nout parti i prézant 25 propozisyon. Néna dan tout séktèr, néna pou lanplwa, néna pou lozman, néna pou rovni, néna pou la rout, pou nout lang, pou transpor féré, etc. Ni atann ké shakinn, ké shak kandida pou zéléksyon rézyonal, ni atann ké shakinn i prézant pou vréman son program. Sirtou, ni atann osi ki arèt fé konm zwazo koukou, ki arèt asiz dann ni lé zot !