Nout tout i koné so problinm lo trin, in problinm kalkil mantal konm i di, dann tan navé lo trin ankor. Sak lé for an kalkil mantal va nyabou démay lo vré èk lo fo. Sé ziwtwar in trin ki sort Sin-Ni èk in ponyé voyazèr, dizon in santinn, alé san. Li ariv la Posésyon, trant i d’sann, vin i mont. Rotyin byin, li roul in pé zisko Por, karant i débark, trannsink i anbark. Zot i suiv byin ziska lèr ? li kontinié ziska Sin Pol é la minm topo vin i rant zot kaz, karant i rant dann trin. Kont byin, apré i roul din sèl tré ziska Sin Pir.

Zot té prévni, sé byin problinm lo trin. Final do kont i fo nyabou trouv lo solisyon pou réponn ? Ala la késtyon : kèl èr lo trin i ariv Sin Pir ? Sanm pou mwin la zot lé mayé. Ala, zordi in késtyon pou poz tout kandida zéléksyon rézyonal. Shakinn i dwa awar son solisyon vik shakinn néna son trin. Tout i rosanm pa, mé tout i apèl lo trin pou zot. Minm si pou lo moman zot i di pa konbyin léstasyon néna ? Konbyin domoun va rant anndan ? Kwar a mwin si zot i vé, tout kandida i koné : Kèl èr lo trin i ariv sin pir.

Koué la éspasé antrotan pou ké toudinkou néna i dékouv lo trin ? Minm sak lété kont, lé pour zordi. Sirman la rézon. I pé pa èt otroman èk la kantité loto i rant la Rényon èk tout dégazman gaz léshapman ki anpwasonn domoun, firamézir néna dé plizanpli zaksidan si shomin konm i di “la rézon la fini par gingn lo dosi“. Aprésa fo kanminm fé antansyon, néna lo trin èk lo trin. Néna lo trin i ral déryèr, néna lo trin i avans dovan !