Lokazyon-la nou la vi bonpé d’moune : in pé téi kroi la lite i sava déboush dsu in viktoir, in pé téi fé sanblan kroir dann la viktoir bande shagossien, in pé téi fé mèm pi sanblan.Sé konmsa k’in jenn marmaye la di avèk mwin :

« wi kroi ou banna va gingn lo droi rotourn shé zot avèk toussa solda amérikin osinonsa zanglé néna laba ?Wi kroi banna va ranporte la viktoir avèk toussa zènmi nénna rogroupé konte zot »

Mi pé dir azot néna lontan mwin la pèrde labitide réponde par oui, sansa par non. Néna lontan mwin na pi labitide dir tèl shoz v’ariv tèl ané apré in sokouss istorik, sansa i ariv ar pa.Mwin la di sinploman néna kék zané, mank in pé –la mank in fil-pou banna arash zot droi pou rotourné.Alor si la manké inn-dé foi akoz i réissiré pa , in zour ?

Lo marmaye la pa di amwin arien mé mwin la vi ali alé apré lo fime manz son boushé do ri shofé, é sanb pou mwin li lété déza loin par la panssé par raporte mon préokipassion...

Soman mwin l’avé konm linpréssion dé shoz i sava spassé pou done listoir in kou d’aksélératèr. Ala ké zédi soir mi gingn in kou d’fil in kamarade é li di amwin konmsa : Olivier bancoult i sorte sone amwin pou dir amwin gouvrnman zanglé épi gouvèrnman morissien la désside négossyé pou règ lo problème shagoss ! Pinss amwin mwin téi san pa, koupe amwin in goute do san téi koul pa.

Poitan toute sak mwin téi lir téi amontre bien, noir dsi blan l’avé in négossyassion an kour avèk konm sizé la souvérènté lil Mauris dsi Shagoss, lo rotour bande shagossien dann zot péi...anpliss l’avé in délé pou in rézilta, komanssman l’ané 2023.

Néna dé foi listoir i aksélèr ! Dé foi li pèz la plate ! A bon ékoutèr salu.