Témoignages - Journal fondé le 5 mai 1944
par le Dr Raymond Vergès

Lakey lo sit > Chroniques > Oté

Néna pi la fyèv palidéène bannzil Komor. Par La franss ? Pa ditou pars pou La franss, y a bon larzan CFA !

mèrkrodi 8 désanm 2021, sanm Justin

Mézami, néna lo trin i ariv apré l’ère é néna sète i ariv a l’ère. I paré bande zoinal i anparl souvan défoi bande trin lé an rotar, mé i di pa arien kan in trin i ariv a l’ère. Vré pa vré, in pé vré, in pé pa vré, mi koné pa tro mé mi romarke néna kante mèm bon nouvèl ossi dann zoinal – mi vé anparl noute zoinal Témoignages, sak i rante tou lé zour dan mon kaz dopi étan pti, ziska zordi.

Dèrnyé bon nouvèl mi vé partaze avèk zot, sé la késtyonn la fyèv palidéenne dann bannzil Komor. Zot i koné, mèm si nou na pi salté-la, shé nou, noute bande frère afrikin i soufèr in bonpé avèk sa. Bannzil komor zot ossi la pèye la tare maladi-la ziska na poin tro lontan. Pi koméla !

Astèr mi antan dan mon trou d’zorèye, in pé i panss La franss la vouli ratrape son rotar-myé vo tar ké zamé ! vyé motar ké zamé !- pars kan la métropol kolonyal la détak baro lézèrman la fin d’lané 74 moustike téi fé déga laba… Mé, lé bien rogrétan, la pa La franss la fé sa. Sé in gran péi i apèl La chine la fé in plan pou élimine la fyèv palidéène é la réiss… prézidan bannzil Komor la romèrssyé lo gouvèrnman shinoi pou sa.

La franss, lé pa la avèk sa. El i okipe son fran CFA pars sa lé plu juteux é ya bon fran CFA Ya bon bande pèp dékolonizé ou prèsk avèk in sorti par la porte é in rantré par la fénète...



Inn modékri, inn ti lavi, inn komantèr ?

signaler contenu


Facebook Twitter Linkedin Google plus