Mésyé, Médam, La sosyété, koz èk moin sé koz avèk in kouyon-sé o pyé d’lo mir k’i oi lo mason. Zot i koné, dann tout famiy néna bann zistoir k’i sirkil, néna galman bann mo-bon konm mové. Moin néna in famiy tout bann moun in pé korporé i donn lo pti nom ti-tone é sa i éspas dopi plizyèr zénérasyon é na poinn rézon pou k’sa i fini. Tanka lo kozman moin la mark an-o la, sa i sort dann sid dann in tan l’avé laba in bransh mon famiy té pankor sort dann sid sovaz pou vni dann nor. Zot i koné d’moun lé o, fitintan demoun téi mok azot-téi di zot i koz pa mé zot i shant épi in kantité kasaz lé kui. Moin pèrsonèl, kan moin la sort dan lé o pou alé lékol dan lé ba, l’avé in bann profésèr kasèr tiboi : inn téi di mèm, si moin téi gingn pa réponn in késtyon : « Domann ton papa in bèf pou toué ral dsi la ké. ». Biensir tout marmaye téi ri : kikiki, kakaka é moin téi vien rouz konm in tomat. Kosa sa i vé dir ? Sa i vé dir, azot bann zadilt, fé in n’éfor pou tienbo zot boush pars zot koné pa konm kozman i fé mal marmaye sirtou si i ropran kont li bann kasaz lé kui li antann tou lé zour, sirtou si néna in piblik pou donn lo poi la kasaz ti-boi. Alé ! Mi kite azot rofléshi la dsi é ni artrouv pli d’van. Sipétadyé !