Oté

Nènène, Dada, séf d’èv an péril an parmi in bann famiy zot mèm an difikilté !

Justin / 27 mé 2019

JPEG - 43.6 ko

Yèr lété la fète dé mèr é la pa bézoin mi di sa sé in n’afèr inportan, sof koman i sélèb sa koméla, mé pou ète inportan li lé inportan. Konm bann zantiyé i di : « Fam sé poto mitan la kaz ! ». Poto mitan sa sé lo poto prinisipal é san li lo mézon i tienbo pa d’bout. Donk, zot i konpran pou kosa mi di fé in fète in sèl foi par an pou bann momon sa sé in n’afèr nésésèr mé la pa an tro - kansréti pou son sinbol lamour matèrnèl : sa sé in n’afèr in bonpé rant nou la gingn an profizyon é mi pé dir azot napoin pèrsone la di dovan moin sa lé an tro.

Mé néna in n’afèr mi pans, lé pa pli inportan k’in momon, mé kant mèm la zoué in bon rol dann l’édikasyon épi l’okipasyon bann zanfan. Sé koi d’apré zot ? Mi pans zot konm moin, ni koné bien sa, Mèm si nou téi done pa zot lo nom mi sava dir azot. Kosa i lé ? Sinploman lo nénène avèk lo dada. Lo nénène sé la sèr pli gran i okip son sèr pli pti, lo dada sé lo frèr pli gran i okip lo frèr pli pti. Sa té in n’afèr kapital dann tan La Rényon demoun l’avé bonpé zanfan.

Astèr kansa lo tit nénène é lo tit dada téi disparète ? Lo pli tar posib. Koméla ankor bann grann pèrsone i parl z’ot nénène sansa z’ot dada avèk vénérasyon é dé foi avèk la krintiv an mèm tan. Ou i fime dovan out Dada ? Lé pa tro loin ou i pé fé ramass ou. Ou i koz sanm garson dovan out nénène ? Ma fiy tansyon pangar Dada avèk nénène lé té lo roprézantan bann paran é zot lété bien nésésèr. Si zordi sa i disparète, kroi amoin lo lien familyal i dovien pli faye, pli difisil pou konsèrvé.
Nénène, Dada, séf d’èv an péril ? Pé sfèr mé si lé konmsa, la famiy galman lé riskab ète an péril.