Mi di sa, pars si Lo Prézidan dann tan-la, la désside sa, si li la apèl sa bann zétazénéro l’outre-mèr, sa i vé dir, mi panss, dann son tète, bann péi l’outre-mèr l’avé bézoin d’in révolission. Pars lé shoz téi marsh pa konm k’i fo, pars a koté sak téi marsh é lo bann voiyan lété prèss o vertr, l avé galman sak téi marsh pa é lo bann voiyan lété kazimlan o rouz. Paris pou li fèr lo bilan sète étazénéro-la. Mi rapèl bien kan léspozé lo Prézidan lété fini, Paul Vergès la di li lété kontan oir l’éta modifyé son poinn-vizé dsi loutre-mèr é an partikilyé la parl lo dévlopman oto-santré épi bonpé zafèr é an parmi l’avé anparl lo rokritman bann kade dann l’outre-mèr é l’avé di ka in « lokal » néna la konpétanss i fo rokrite ali é pa in moune téi sorte déor ?

La movèz shanss Prézidan-la la mète an plass in gouvèrnman la okipe son tan pou sabote laplikassion son bann zidé. La malshanss li la pèrde zélékssion prézidan é sak la ranplass ali té in sossyaliss, bien anmitouflé dann son kostime néo-kolonyal. Malshanss pou nou Paul Vergès la pèrde zélékssion épi son ban réform lété arété nète. Si tèlman k’aprésa l’ariv sak ni koné avèk in manda Hollande, avèk 2 manda Macron é zordi la fine dévir lo do avèk sak Sarkozy — in om de droite — l’avé propoz pou bann péi l’outre-mèr… In bann réform Paul Vergès si mi tronp pa l’avé apréssyé.

Astèr i pé dir akoz la mète in moune déor konm réponsab lo PRMA olèrk pran in rényoné parétil bien kapab fé lafèr ébin sa lé marké dann la politik néo-kolonyal é tou mé sa lété ékri d’avanss dann la vi politik noute péi.

A bon antandèr salu !

Justin