Oté

Nétoiye la mèr bann déshé plastik. La pa domin la vèye

Justin / 14 séptanm 2018

JPEG - 43.6 ko

Mi koné pa si zot la gard télé néna dé-troi zour é si zot la vi zafèr-la. In bato pou ramas bann déshé plastik dan la mèr. Par l’fète néna plizyèr prozé demoun bone volonté la fé pou nétoiye la mèr bann déshé-la. Pou kosa i fé sa. Pars dann la mèr, in pé partou néna in gran kantité plastik i sali la mèr, i okip la plas normalman rèzèrvé pou bann zanimo marin. Kisoi bann poisson, kisoi bann torti, bann balène, bann dofin épi in kantié zanimo in pé tout kalité.

Pou di la vérité, bann bon n’afèr mé ni pé d’mandé si sa lé bien éfikas. Lé vré banna i sava ramas in ta avèk in paké la salté mé néna in pé d’moun i kroi pa va gingn fini avèk salté-la. Pou koué. Pars la pa solman zordi demoun dsi la tèr i koné zète plastik dan la mèr va fini par in katastrof. Lo pli intélizan noré été k’i fé pa mé l’imanité sé l’imanité, èl i pans la mèr lé si tèlman gran, si tèlman o-fon k’i risk pa arien dévèrs bann plastik dan la mèr.

Astèr in pé i di konmsa. Ramas plastik lé bon, mé lériskab armas arienk bann gro morso é tout bann ti kont an milyar d’milyar sa i gingn ar pa ramasé é sé sa k’i fé lo plis déba dsi bannzanimo dan la mèr. Néna d’ot i di konmsa. Pou kosa i kal pal o bann déshé kan zot lé dsi la tèr, akoz i nétoiye pa bann bord mèr plito k’alé rode bann déshé dan la mèr.

Pou di la vérité lé obligatoir nétoiye partou, kisoi dan la mèr, kisoi dsi la tèr, éstop lo pli bonèr k’i fo pran la mèr pou in poubèl. La mèr la pa in poubèl é pétète i fo kont dsi èl pou sov l’imanité si nou la pankor détrui aèl avan mé nou va anparl de sa.-ni arète ar pa d’an parl de sa. An parlé. Oui kozé lé bon, mé li lé pa sifizan mé toultan larzan va komann lo mond lo mond sar dann danzé.

An atandan nétoiye la mèr. Ok mé pétète la pa domin la vèye.