Témoignages - Journal fondé le 5 mai 1944
par le Dr Raymond Vergès

Lakey lo sit > Chroniques > Oté

NGL

zedi 1 zwiyé 2021, sanm Justin

Sé in kékshoz la spassé néna lontan. Sé in kékshoz la spassé issi dann loséan indien a pène dë mil kilomète distanss par raporte nout péi bien émé, noute péi La Rényon. Sé in n’afèr afrë, k’i fé singn noute kèr zordi ankor. Sla spass dann bannzil Chagos.

Dopi lontan bande USA l’avé désside sa lété in bon baz militère pou zot, sirtou lo pli gran anparmi bannzil sate i porte lo nom Diégo Garcia. L’avé lontan langlétèr avèk usa té apré diskité pou mète azot dakor pou instal in grande baz militèr US dann loséan indien. Bande zékspèr la ékri in kantité rapor dsi Chagos épi Diégo Garcia. Ziska lo zour la mète dann la ribrik, popilassion lokal troi drol de lète.

Pars L’avé sirtou kékshoz té apré trakass banna : téi falé pa l’avé d’moune dann bannzil-la. Zot i koné lé zami, bande sèrviss sogré, bande zékspèr, an final dekonte zot i fini par donn la réponss zot shèf épi zote mètr i domande azot. Sé pou sa, kan bande militère lo Pentagone, épi bann zanglé la vi marké dan in rapor dsi la popilassyon bannzil Chagos lo troi lètre mi anparl na-o la, zot la pran sapou in signal dépar.

NGL ! Pars NGL pou zot sa i vé dir néglijab. Sa lété pou zot konm in lotorizassion pou vide lo trépé é sé larmé anglèze té i doi fé lo sal boulo... Kék zané apré lo péi té vidé : ankor pli NGL ké dann rapor bande zékspèr.

Médame zé méssyé, la sossyété mi sorte rogarde ankor in kou lo fime la pass dann archipèl dsi la soufranss noute bande frèr é sèr shagossien(e). Mi doi dire azot ankor in kou mon larm do zyé la koulé kan mwin la vi kossa bande USA épi zanglé la fé avèk noute bande frère é sèr chagossien.
NGL ? Poitan la poin pti pèp dsi la tèr ? In pèpe sé in pèpe ? Sa lé vré pou toute pèp é sa lé vré biensir pou chagoss konm pou lé zot. Na poin in pèpe néglijab : sa i égziss pa, dire salé konm in génosside déklanché.



Inn modékri, inn ti lavi, inn komantèr ?

signaler contenu


Facebook Twitter Linkedin Google plus