Matante zélida la ékrir Justin :

Mon shèr nové, mon spèss salté, rouj-de-fon dovan l’étèrnité, mi san bann rouj néna ankor in n’afèr pou dir kont la politik lo pti prézidan La franss. Mwin lé sir zot i trouv ankor a rodir dsi son politik kont lo Kovid. I diré zot lé pa kontan profite la politik La franss dann domène la santé. Apré tout shari vari, astèr kan i trouv in bon solissyon.Astèr kan i di i sava vaksine gratuit tout demoun sak i vé i diré zot l pa kontan ankor. Kossa zot noré di si zot lété Madégaskar sansa d’or péi ankor ? Zot noré boir siro ! konmsi siro nora fé kékshoz kont la maladi. Tok ! Pran sa pou toi !

Justin la fé pou répons :

Mon vyé matant k’i koz toultan la boush rouvèr, nou na poin arien pou di kont nout sistèm santé.-sof ké déssèrtin ia arète pa d’atak ali dopi in bon koup de tan. Nou lé mèm kontan bénéfisyé in sistèm ko nmsa mé mi doi dir aou nou rényoné, nou ossi nou la kontribyé é ni kontribyé ankor sistèm-la é la poin arien pou roprosh anou dsi so poinnvizé-la. Sistèm santé sé inn é politik santé sé in n’ot é sé sète-la ni panss la été mal améné...

Astèr dsi lo vaksin, matant, nou néna in roprosh pli konsékan ankor pou fé . Vi koné néna in valèr ni aprésyé sé la solidarité : in min i lav l’ot . Lété lokazyon pou oir si noré in vré solidaritéinternasyonal dann in pandémie internasyonal...ébin ziska zordi ni oi pa. Par la fote lo sistèm kapitalist néna konm prinsip fé larzan avèk tout zafèr.Sé pou sa ni rant dann in kriz long diré : ni koné kansa la komanssé, ni koné pa kansa v’arété. La politik l’égoïsité la pran lo déssi.Tok ! Pran sa pou ou.

NB Mi panss lé fasil krétik la médsine par bann plant konm i fé Madégaskar, mé pétète ala in pist i fo pa néglizé.