Oté

Ni artrouv pli d’van é konm i di : honi soit qui mal y pense ! Mové lang la di la fé

Justin / 8 désanm 2018

JPEG - 43.6 ko

Zordi samdi é mi domann éskiz par avans bann moun i mank in pti katsou pou fé l’ero. Mé konm mi antann radyo pèrkal apré jakasé pou parl bann pri épi bann rovni moin la ramas dann mon tète inn-dé zafèr pou anparl avèk zot, konmsa a kapéla.

Promyé zafèr moin la lir dsi l’internet in madam dépitéLRM-donk gran makronis dovan l’étèrnèl-apré di èl néna in tik-tak pou sak i di zot i pé pa manz tou lé zour. El i konsèye azot manz tou lé dé zour. Moin la vi galman in dépité LRM la di èl i koné pa lo smic konbien i fé. In n’ot la di konmsa avèk 5600 éro par moi lé difisil aèl pou zoinn lé dé bout par l’milyé.
Akoz i obliz pa bann dépité fé in éstaz dann klass popilèr ? Sa i évitré azot di la kouyonad plis k’i an fo.

Isi shé nou nou néna Didier. Konm noré di mon vyé momon dann tan li lété vivan : sa sé inn flèr d’poi ! Zot i koné flèr d’poi ? Sa lé zoli sa, sa sé in flèr arivé.
Kosa sé son l’aktyalité ali zordi ? Zot la vi ali dann télé avèk son figir avnan. Sa sé sak i spass dovan, mé déyèr paravan, kosa k’i éspas ? Zot i koné lo koméraz dézyèm travaye li la pran épi dézyèm salèr li la fé done ali : 6800 € lo moi. Sa i tir pa dsou la pate shoval sa. Mé rozman toudinkou romor la pran ali épi li la déside ronons son plas. Lé for mésyé Didier la , lé tro for é posib demoun la aprouv ali
… Mé oila néna in n’afèr li la obliyé. Sé koi, lo gro rapèl li té pankor toushé é kan sa l’arivé, plis san mil léro ébin. Kosa ? Li la pran pou li ? Non va li la mète lo larzan en éstaz dsi son kont an atandan li fé in fon pou ankouraz bann jenn myé apraann la syans. In fon la fini fé ? Non mé i tard ar pa. In zilé zone, sa i done la vèrtu sa otoi. Konm zot i oi.

Pandan éstan-la mésyé lo préfé i kont i rokont lo panyé la ménazèr. In pa nyé la kalité siouplé konm matant Girardin i di. Sa sé in n’afèr i grate pa lo kropyon sa i fo konté, arkonté, pézé, sou pézé, kalkilé konmsa lo nouvo panyé i kout trant éro do moins ké lo lansien panyé. Enfin nou va oir, kan sa va pète an flèr dann réyon mèm bann zilé zone va tonm pal si tèlman li lé kalou.

Alé, nou néna lo tan anparl tousala, an atandan nou va ko ète kosa k’la spass dann la komine Sint-Mari. I prétan néna in trikmardaz laba é konm i fo l’opinyon i lapide kèlk’in, sé koté Sint-Mari la zistis la dévir son fare. Ni artrouv pli d’van é konm i di : Honi sot qui mal y pans ! Mové lang la di la fé.