Astèr kan mi sava rogarde dann mon téléfone — néna myé konm diksyonèr mé mi pé kontante amwin avèk sa pou zordi — mi oi léssanssyèl sa i vé dir kékshoz inportan, kékshoz i pé pa s’anpassé si i vé fèr in n’afèr itil. Ni pé di ankor sa la pa in détaye. Li sré mèm kékshoz kapital.

Astèr kossa i pé z’ète kapital pou noute péi dan léta li lé randü ?

Déza ni pé dir noute péi — son lékonomi an promyé — lé dann la kriz é dopi in boute tan. In bonpé lantropriz lé riskab fèrmé ; néna pré d’la moityé lé dsi la movèz pante. Ni pé dir ankor néna tro d’shomaz dann La Rényon : in sinp koudèye dsi dsi bann linskripssion dann pole anploi i pé ransègn anou. Ni pé dir ankor néna la mizèr é souvan dé foi dann noute zoinal ni anparl sa. Néna lanvironeman, néna la formassion,.. Donk néna toute sak parti kominiss mé pa solman i amonte lo doi konm voiyan o rouz dopi touzour.

Toussala lé inportan mé kossa i lé léssansyèl ? Sak i doi égzisté é ni pé pa s’anpassé si ni vé noute péi épi son bann zabitan i antir azot konm k’i fo. Mwin mi diré sé toute sak i fo pou k’noute péi i koné in vré dévlopman.

Mé kissa i doi désside sak lé éssansyèl ? Souvan dé foi noute kamarad Maurice i di i fo in plan rényoné, fé par bann rényoné, pou bann rényoné. Mi panss ni pé dir na pwin d’plan zordi é sirtou pa fé par bann rényoné pou bann rényoné… sa in gran féblèss pou lo péi. Ni pé fyé dsi gouvèrnman pou sa ? Ni pé fyé dsi in Prézidan ?

Mwin la romarké sé in an avan li sava ké lo Prézidan i propoz in plan : Kissoi Sarkozy avèk son diskour an novanm mèm pa in avan li dégaj. Kissoi Hollande avèk son légalité réèl, kissoi ankor Macron, son dézyèm manda i tir dsi la fin é li la pankor propoz anou kékshoz sèryé… Macron avèk sèryé sa i rime pa ansanm. Mézami in Prézidan sa i disparète épi i anparl pi, gouvèrnman lé parèye. Lo pèp i shanj pa li é li lé atann in dévlopman dirab. Pars nou la touzour rate noute dévlopman ziska zordi.

Noute parti — pars li lé kominiss é rényoné, i réklam touzour in rényon toute bann fors viv mé i fo dir zordi lé z’inn avèk lézot néna tandanss ral la kouvèrte pou zot. In mové zafèr ! La pa konmsa nou va nyabou mète noute péi dsi shomin lo dévlopman.

A bon antandèr, salu !

Justin