Mi koné bien toulmoune i panss pa konmsa pou lo gran bien lo kapitalism franssé épi éropéin konm pou lo capitalism konprador-lokal mé k’i mète ali o sèrvis lo kapitalism déor. Banna konm i di i fé d’fé avèk ninporte ékèl boi. Toute fasson, ni koné , lo konba pou noute zidé i arète pa an in zour-sirman li va dir ankor lontan.

So matin mwin la antande dann radio issi la Rényon i gingn pa fé lo bio é toute sak i di zot i fé lo bio zot lé mantèr konm bande zarashèr d’dan épi d’azouté déssèrtin i fé lo bio mé lo dimansh épi lo soir zot lé dann zot karo apré pilvériz bande produi néna arien a voir avèk lo bio é biensir lo lanimatèr radio sé d’pète a rir alé oir sa noré di mète ali an kolèr plito.

Mé néna kant mèm dé shoz i rékonforte bande zamouré la natir, konm kan i fé la fète chouchou é wi antan dir dann Salazie bande prodiktèr i fé chouchou bio é par milyé d’tone é kan i di la prodikssyon i goumante ofiramézir. Kissoi lo bio, kissoi la prodikssyon rézoné, mi panss nou lé dann bonshomin.

La prèv kan wi antande néna la fète létchi, la fète longani, sète zartisho, sète zanana, sète gouyavyé, sète l’aye, sète zognon épi d’ote é d’ote ankor-biento va fé la fète do ri é akoz pa sète mayi pinm é d’ote ankor. Toussa pou dir si noute léguime épi noute frui lé dign d’ète fété nou lé kant mèm déza dann bon shémin. Astèr noute prodikssyon i mérite d’ètefété, mé galman d’ète défandu é pliss ké li lé zordi.Mé mi panss sé in n’afèr ké ni fé noute toute noute priz konsyanss.

A bon antandèr, salu !