Matant Zélida la ékri Justin :
Mon shèr nové, mon spès salté,
M’a dir aou pou kosa droit konm gosh, sindika konm z’asosiasion la pa done zot l’opinion gouvèrnman dan lo gran diskision la fé dan l’Outre-mèr. M’a dir aou pou kosa, pars moin na konm l’inprésion bann rouj-de-fon na konm k’i diré in pé brouyar dan la tèt. Zot i kroi gouvèrnman i vé vréman fé in n’afèr pou bann péi l’Outre-mèr é pou tir banna dann tablatir zot i lé. Lé pa vré ! Pars si minis Lurel té i vé fé in n’afèr konm sa, li pouvé fèr é dopi in bonpé d’tan. Donk, si li la pa fé dopi plis vint-an, akoz zot i vé li fé zordi ? Bra kasé avan z’éléksion Hollande, bra kasé apré ! Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Antansion, ni kroi pa Pèr-Noèl, ni pans pa i fo done in pé lo Bon Dié san konfésion. Ni domann solman lo réspé bann promès. Kèl promès ? Sak Prézidan Hollande la fé. Donk ni domann son gouvèrnman i traï pa promès lo prézidan. Kan i di sé Zan-Mark Ayrault va shoizi sis, sèt propozisIon, ni méfié. Pou kosa ? Pars Zan-Mark Ayrault la pa promèt anou arien dan la kanpagn. Arzout èk sa, nou la fine oir koman in gouvèrnman épi son bann minis i trok langaz pou fé dir in prézidan — dann tan-la té Sarkozy ! — sak li la pa di. Ni rapèl bien sak madam Penchard té i di, koman èl la tradui lo diskour lo sis novanm 2009. Konm i di souvan, traduir, sé traïr, é pou in traïzon té in traïzon ! Astèr nou la fé nout propozision. Ni koné sé sak i fo fé. Si zot i vé pa, mèt azot pansman dsi zanm de boi. Mé tansion pangar, demoun i aksèp pa sa ! Tok ! Pran sa pou ou !

 Justin