Mésyé lo nouvo l’avé di konmsa : li yèm pa pèrde lo tan. Li sava l’Élizé pou li règ la késtyonn z’akor Matignon. Pars bann shoz konmsa, i atann pa... bate lo fèr kan li lé sho, konm diré in romans bann rouj-de-fon i shante tazantan. Li té i doi galman alé oir mésyé Fillon pou règ l’afèr rant moun byin.
Donkalor, toute demoun té i atann in règléman rapide déssi la késtyonn tram-train épi la rout-litoral, épi bann déklarasyon frakasant k’i sava ansanm, dann lo zanr "tyé douz, blèss katorz !" Solman, lo tan i pass épi konm sèr Anne, ni oi pa aryin vénir. Ni antann pa non pli bann déklarasyon k’i anons lo shanjman.
Kossa l’arivé don ? La korde sré tro o pou soté ? Lo poi tro lour pou lévé ? Sansa in pé la mank tranglé kan li la di kosa li vé fé... koman li vé aporte la démanti nout ti prézidan déssi la késtyonn l’énèrzi i tir dann volkan, koman li vé tourn lo kolé noute l’otonomi énèrzétik, koman li vé fèrm lo také toute bann gran z’intéléktyèl lo mond antyé déssi la késtyonn la MCUR. Pétète, sansa pétète pa ? Mé an tou lé ka, i antan pi ali. I aspèr lo shanjman, li la promète, mé i ariv pa. Ni ékoute mé ni antann pa !

Justin