Oté

« Ni komande pa niyaz pou fé tonm la plui »

In kozman pou la rout

Justin / 27 zanvié 2021

JPEG - 43.6 ko

Médam zé Méssyé, la sosyété, koz èk mwin sé koz èk in kouyon mé sé o pyé d’lo mir k’i oi lo masson. Mézami, mi di azot kozman-la zordi, mé la sèshrèss l’arété é la plui i tonm pa san pour san, konm vash ki piss, mé kant mèm in pé. Inn-dé bon grin konm bann zansien ti di.Mé trozour kan la plui téi tonb pa nou téi fé pa lo fyèr par raport lan sègnman bondyé la donn anou dopi lontan. Fransh vérité ni komand pa niyaz ! Mé mwin la konète lo tan légliz téi roganiz proséssion pou domann bondyé la plui. Mi souvien mèm dann tan l’avé donn l’aviyon Samat konm mission d’alé bonbard niyaz, mé i paré la plui la tonb an mèr. Mé l’om lé inkonstan, kan la plui i tonb touzis s si li souplègne pa Bondyé pou gingn in pé lo botan. Alé ! Mi kite azot rofléshi la dsi pars lé pa tro pti k’in zour néna in madré i komand pa la plui avèk son montr konékté, mé zour-la la pankor arivé é d’issi-la nou va artrouvé. Sipétadyé osinonsa sipétabillgates.

Nb kan mwin la di ni komand pa niyaz, la pa fote pou in pé d’avoir ésséyé. Mi souvien kan bann jenn-jan té i sava bal-dann tan lontan- zot téi pik kouto dan la tèr pou pa la plui i ariv. Rézilta ? Mi koné pa.