La vi lé shèr pou vréman. Kan wi sar fé komission, out posh i fé pitié apré. Kan i ariv mlié lo moi, la bank lé bon, pou mète aou in pti lamande, san di arien pèrsone, fé pèy aou bann fré an plis.. La mizèr si l’do maléré konm karapat déssi l’do bèf mèg.
Lé vré lé bien vré, lé dir pou ariv la fin lo moi : loiyé li ! z’inpo li ! krédi-li ! transpor, manzé, médikaman, produi toilète. Ziz pi si ou la pa pran prékossion, si wi invite out famiy in pé souvan... Aprésa, nana dolo pou péyé, la limièr galman.
Zistoman, si nou kalkil in kou bann norm HQE. Si ni mazine dann limèb nana in sistèm pou ramass lo la pli : sa lé bon pou lav linz, nétoiy a-tèr, pou kabiné. Pa pou boir, mé lo rèst ! Parèy pou lo sho, la limièr ! Si nana an sifizans bann pano pou kaptir la shalèr pou transform sa an kouran léktrik. Ala, in manièr pou pa tro dépans larzan ! Lo van ossi, i pé transform an kouran.
Sa la pa in manièr pou soulaz nout posh ? In pé va di : i pé touzour révé ! Moin mi di : ni doi révé ! Vik lé possib...sa i dépann dé nou ! Alé, n’artrouvé !

Justin