Biensir zot la rézon é toute bande zélu sé bande zom de pouvoir mé lo bande pouvoir lé kassé par boute. Souvan dé foi i partaz sa avèk in préfé, in gouvèrnman la pa ou, in bande gran sèrvis i dépande bande minist parizien é konm lo tablo lé pa konplé i fo ni azoute ankor l’amandman Virapoullé, bande règloman l’erop étsétéri-étsétéran, la ké lo ra… Assé do koi pou koupe la zèl bande zom de pouvoir angazé dann in pouvoirkassé par boute.

Mé dizon sa i anpèsh pa fé dé shoze mèm si tazantan nou néna dan lidé ké lo sèl zafèr ni gingn bien fèr sé lo sir-plass é konm sak i avanss pa i rokil, souvan dé foi nou néna dan l’idé nou l’apré rokilé. Astèr alon dir ni pé fèr dé shoze é dann in bonpé séktèr ni koné kossa ni doi fé pou nou avanssé. In sinpe lipotèze pars lo sistème néokolonyal lé la, é li anbar anou shomin dann in bon pé ka.

Dann in lipotèze konmsa i fo ou néna lo bande tèks de loi, i fo ou néna lé zom k’i fo pou fèr, épi larzan lo nèr d’la guèr. Astèr ni mète sa dann la min lo pouvoir san suiv l’afèr épi san kontrol ali… Sé la ké lo traka i komanss pars lo pouvoir – toudinkou – li panss sé li k’i désside sak néna pou déssidé, é sé li k’i pilote pars li panss sé li lo sèl pilote a bor. Sansa néna avèk li in minorité d’moune k’i panss konm li : lo pèpe néna ka aspéré, é volaye kui va tonb dann son boush… Poitan lo pèpe lé la ! Li ossi néna son zidé ! Li ossi lé kapab kriye danzé si i fo kriyé.

Dann tousala par l’fète néna in kalité d’moune ni pé pa s’an passé é lé pa bon s’anpassé, sé bande militan é bande militan i doizète la pou fé avanss bande projé, pou signal si néna kékshoze lé mal goupiyé, é pou suiv pazapa lo manyèr lo projé i avans… Mézami, mèm si zot lé dakor avèk lo pouvoir, – si zot lé dakor avèk linstitisyonèl – obliye pa lo militan sa lé nésséssèr é sa ni pé pa s’anpassé pars sa sé la garanti ké lé shoze va bien éspassé.

Justin