Oté

Ni pé trap nout sékirité alimantèr pou ranpli boujaron nout bann konpatriyot !

Justin / 12 désanm 2018

JPEG - 43.6 ko

Matant Zélida la ékrir Justin :
Mon shèr nové, mon spès salté, rouj-de-fon dovan l’étèrnité i parétré ou la ékrir kékpar la sékirité alimantèr sé in lézitime défans pou nou rényoné. Alé zoué kanète don ! Nout léjitime défans sé la mèr patri i asur sa pou nou. Nou lé fransé konm tout fransé é ni domann La frans ki plèv, ki vant, ki siklone, ki briz, ki kass, i asura pou nou lo nésésèr pou boir é manjé. Ni vé lo mèm droi ké bann fransé d’Frans in poin sé tou. Frèrmé lo giyemé ! Tok ! Pran sa pou toué !

Justin la fé pou répons :
Mon vyé matant k’i koz touzour la boush rouvèr sak ou i di i étone pa moin é mi oi ankor in kou ou lé parti dsi la domann siouplé é out domann i plé pa moin ditou. I kont pa dsi baton tonton pou travèrs la rivyèr. In pé i di : i kont pad si bato tonton pou travèrs la mèr é sa imi yèm bon pé.
Matant, ala mon késtyon : d’apré ou avèk lo tèr nou néna, avèk lo klima nou néna, avèk nout savoir épi nout kapasité, ni pé, ni pé pa ranpli lo boujaron nout bann konpatriyot ? Si ou i di non, tak baro toutsuit. Si konm moin ou i di oui, é si isi néna kansréti in rényoné dsi dis désidé pou produi nout manjé é bin sra oui, é nou va fé. Pou kosa ?
Pars mi di é mi rodi lo droi manzé boir,-donk asur nout sékirité alimantèr-sa i rolèv nout léjitime défans. Nou lé pa blijé produi tout, mé ni doi produi nout baz alimantèr é bien ramass sa dann magazin pou lo ka. Apré nou va gingn viv kèr klèr. Pars koméla, lo pli pti kriz é nou lé afayi, é ni gingn l apèr, kapakap la fain i mont dsi nou. Touzis si ni bataye pa pou in pint do ri é troi grin zariko.
Ou i san pa matant nou lé rabésé dann in ka konmsa ? Alon marsh droit, alon lèv la tète, alon fèr an sort nout tèr, nout mèr épi nout matyèr griz i amenn anou pou trap nout sékirité alimantèr. Tok ! Pran sa pou ou !