Dimansh k’i vien i arvote pou dézyèm tour. Konm d’abitid nana zéléktèr va voté, nana sak i vot ar pa, nana sak va vote blan. Pou kosa ? Pars nana sak i trouv sak zot i rod dann in lis kandida, épi nana sak I trouv pa sak zot I rode shé lé z’inn épi shé lé z’ot.
Bann sak i vé bate karé, zot va trouv z’ot bonèr. La i sa voyazé la ! Nana sak i rod arienk bat karé dann z’ot l’oto zot osi va trouv z’ot bonèr. La I sava fé lo tout otomobil la ! Nana sak i konfonn problèm la vi avèk problèm loizir, zot i sava ète sèrvi. Lo konsèy i amiz total kapital é li mèm pou komansé ! Zot i voi la vi, kisoi an blé, kisoi an roz, kisoi an miltikolor, mé solon zot, l’avnir lé klèr pou zot.

Mé konm di lo kont sak i oi arienk gro-gro niyaz noir dsi l’orizon é i vé oir dispèrs so bann niyaz-la, é klèrsi in pé lo syèl nout péi, koman zot i oi lo votaz pou dimansh ? Plantèr, koman ti oi ton domin. Viktime la rouvèrtir bann marshé, koman ti oi ton domin ? Moun na poin la kaz, koman ti sava trouv in toi pou an paré ? Shomèr, ti pans vréman domin na in travay pou toué ? Lo loi pou l’égalité réèl si bann z’élu i mouye pa z’ot mayo ébin kosa gouvèrnman i sa mète la-dan ? la povrété, koman i règ sa ? L’ilétris, kosa i fé èk sa ? Réshofman klimatik, koman ni anpar ?

Mi èmré pou lo votaz dimansh kélk’in i réponn mon késtyon : rant lé dé, nana inn lé kapab fèr avans la solisyon nout bann problèm ? Plis ké l’ot si oui mi vote pou li, mé moin na doutans. Donk in késtyon sibzidyèr : nana inn, rant lé dé, lé moin danzéré ké l’ot pou nout l’avnir ? Si oui mi vot pou lo moin danzéré, mé si lé dé lé galman danzéré pou kisa mi vote ?

Mi rod mé mi trouv pa donk mi vote ni pou inn, ni pou l’ot. Lé domaz dir sa, mé pou dimansh sar konmsa.