Matante Zélida la ékrir Justin :
Mon shèr nové, mon spèss salté, rouj-de-fon dovan l’éternité si mi konpran bien zot lé intérésé par in l’asanblé lo téritoir. Moin lé a d’mandé si sa la pa in n’ot fason rolans lo séparatis. Moin lé a dmandé si la pa in n’ot fason rolans lotonomi. Pou kosa mi di sa ? Pars avèk zot lé shoz lé zamé fini é tout bann zokazyon lé bon pou zot fé lèv lo mor. A antann azot demoun noré l’inprésyon lé shoz i va mal isi shé nou. Poitan lé loin d’ète konmsa é moin lé sirésèrtin bonpé péi i yèmré z’ète dann la sityasion ni lé koméla : la pa lo paradi biensir, mé la pa l’anfèr non pli. Tok ! Pran sa pou ou !

Justin la fé pou répons :
Mon vyé matant k’i koz toultan la boush rouvèr, biensir mi di arpa ou la vi ni amenn isi sé in vi d’anfèr. Biensir ni rode pa non pli lo paradi. Mé sak ni di sé ké lé shoz i pouré alé myé ké zot i lé koméla. Mi pans ou la fini antann pli d’in foi nou lé dann in sityasion atipik : sa i vé dir nou lé pa vréman dévlopé san pour san, mé nou lé pa non pli soudévlopé. Sa i vé dir néna désèrtin v oiyan i klèr o vèr, mé néna galman désèrtin voiyan lé dann rouj.
In légzanp : lo bann l’antropriz lé pa bien koméla, néna touzour in kantité d’moun ilétré, néna dé problèm dann lojman, dann lédikasyon mé néna sirtou in gran linégalité rant lo moun anlèr épi lo moun atèr. Voiyan o vèr néna osi, bien sir, mé la pa tout sak i kont konm voiyan lé o vèr. Alor, sak lé sir sé ké nout péi la bézoin d’in gran shanjman é la pa arienk nou bann rouj i pans sa, néna galman bann zilé jone, épi néna tout in kantité d’moun i majine lo bien pou lo péi i pans galman konmsa. Zot i kontant pa d’in sistyasion konm nou néna zordi.
Matant ou i an souvien bann manifèstasyon Cospar kan plis vin mil pèrsone la dsann dann shomin pou domann in vré shanjman zot la pa gagné. Dopi moi d’novanm bann zilé jone i arète pa domann in shanjman dann lo péi é si i tienbo pa kont sak lopinyon i pans moin lé sir nora ankor boulvèrsman par dsi boulvèrsman. Ni pé pa kontinyé konmsa matant é sé pou sa désèrtin i domann in l’asanblé lo téritoir pou fini par trouv in bon solisyon pou nout tout rényoné. Tok ! Pran sa pou ou !