Matant Zélida la ékrir Justin :

Mon shèr nové, mon spès salté rouj-de-fon dovan l’éternité,
Mi konpran pa kosa in pé, zot an parmi nana kont mésyé Didier. Pou kosa zot i vé anpèsh ali travay ? Pou kosa zot i anpèsh ali fé son lotorout la mèr ? Mi pans sé plito z’ot grokèr k’i zoué la-dan. L’èr-la tout moiyin lé bon : boush son shomin pou alé fé tir rosh dann la ravine latanier, fé rokour pars d’apré zot l’anvironeman lé an danzé, kriy partou lo rout va doub de pri kan li sar fini. Astèr ziska bann zournal La Frans i trouv moiyin anparl la rout la pli shèr ké nora, avèk près 133 milyon l’éro par kilomète. Alé azot ! kontinyé z’ot prédikasyon, z’ot malédiksion, z’ot masinasyon, z’ot portaj de plint. sèl z’afèr mi promète azot : si sé pa Didier k’i fé, sak va suiv ali va fé, pars sé in bon solisyon. Tok ! Pran sa pou toué !

Justin la fé pou répons :

Mon vyé matant k’i koz touzour la boush rouvèr,
Ou i rapèl pa tout l’annuiman zot la mète Paul Vergès dodan kan li lété prézidan la réjyon don ? Rokour par dsi rokour ! Prosé par dsi prosé ! Pou finir par arète lo tram-train, la mcur, la rout litoral èl mèm ; poitan tout demoun té i rokoné son bann projé té itil épi té i kout pa plis l’arzan k’i an fo. Majine aou matant si l’avé pa kass tout projé Paul Vergès La Rényon noré té fine pli avansé ké li lé é an pliské sa noré té fine amors son dékolaz ékonomik, malgré la kriz. Lékilib énèrzétik li ! Lo train li ! la rout litoral li ! Arzouté sanm sa rout tamarin, arzouté sanm tout bann lisé la fine fé, arzouté avèk in gran mézon bann sivilizasyon. an pliské sa lo tourism n’oré zordi in n’ot figuir.
Matant, plèr pa pou Didier Robert, sé li k’ lé apré fé son malèr épi la n’ot an mèm tan. Sink z’ané vid ! Sink z’ané blan konm in domino doub blan ! Sink z’ané san projé konsékan ! An plis ké sa, ni sar sort la-dan... parl pi ou !.. Nout po d’f.. dann nout min. Tok ! Pran sa pou ou !

 Justin