Vi k’moin lé dann parti kominis, mi tash moiyin rézone an klass sosyal. Mé isi shé nou, la pa si tèlman fasil pou fé in l’analiz konmsa. Pars moin pèrsonèl, moin la pankor antann in l’analiz de klass la sosyété rényonèz i plé amoin toulbon. L’èrla, mi kalkil, mi kalkil minm an éspéran an avoir in zour in bon vizyon dsi la sosyété mon péi épi an aspéran sa i done amoin in klé pou nout pèp mète in poin final avèk la dominasyon kolonyal dsi nout péi.

Mi souvien, in zour dann in éstaz sindikal, nou l’avé gingn in bann pti liv téi asplik anou lo kapitalism a partir d’lo poinn vizé la sosyété fransèz. La dan l’avé in ta z’afèr lér té vréman intérésan konm la plu-valu-koman l’aktivité bann travayèr i donn in pé plis valèr in matyèr promyèr, sansa in produi domi-élaboré - Konm lésploitasyon kapitalis-koman lo travayèr i vann son fors travaye pou lo kapitalis fé l’arzan. Moin la lir ankor koman lo larzan sé lo sèl é inik valèr dann in sosyété kapitalis. Epizapré moin la gingn lokazyon lir in bann z’afèr intérésan dsi la sosyété fransé. Mé oila, moin la pa trouv la limyèr moin téi rode dopi lontan pou in bon l’analiz do klass nout sosyété rényonèz.

Zot va dir amoin : i fo pran lé shoz konm i vien, san alé rode lo bout toultan. Mé oila, pétète sé so bout la, i pé pèrmète anou an avoir in l’analiz korèk dsi la sosyété rényonèz… Mi souvien mon bann l’ansien kamarad, in pé la fine tras l’ot koté la vi, téi ésplik koman, dann tan, l’ané 1956 lo klass bann travayèr-prolétèr si zot i vé - lété in gran majorité donk lété pou sa nout parti kominis (lo fédérasyon) la gingn in mazorité dann zéléksyon dépité-Paul Vergès, Raymond Mondon-épi la droite la gingn in sèl dépité : Raphaèl Babet .

Dann tan-la ni pé dir l’avé dé kontradiksyon prinsipal sète lo pouvor kolonyal épi nou, é sète lo kapilalism (bann gro blan)épi bann travayèr épi bann plantèr. Mé zordi, nout sosyété la pi konmsa : travayèr na pi tèlman tèlman, kapitalis rényoné i komans ète rar konm korn lapin, é lo kapitalism bann fransé épi lo pouvoir kolonyal la fine pran lo pa dsi bann kapitalis gro-blan… Alor dsi kèl klass sosyal ni pé baz anou pou shanj lo rapor bann fors ?

Moin pèrsonèl mi oi pa la solisyon pou zordi. Si néna i oi, rouv nout zyé.ni yèmré bien, pou nout par, sort dann fénoir, rant dann la limyèr.