La semènn passé lavé in bel ralé-poussé dann zournal : A s’ki paré, dé dépité vréman malfondé la rofiz donn zot plas dan l’avion in vié moun malad. Mank de po, lé pa vré. Zournal de l’île lavé son l’informassion, li la fou l’kou san agard ki k’i pèrd, ki k’i gingn. Li lavé tor, mé la pa li pou dmann z’éskiz.

Solman, lo z’afèr i arète pa la, akoz issi, nana zournal mé nana galman la télé épi la radio an gaspiy. Tout la bann la ropran lo linformassion épi la bat tambour. Bann moun i ékout la radio l’armèt z’ot grinn’sèl déssi, kisoi pou pran pitié pou l’moun malad, kisoi pou mont dsi la lanp lo dé dépité.

Lé ga, si demoun té i ashète pa zournal kan l’apré malparlé, nora poin zournalis pou alé ramas la mantri dan la kivète. Si lavé poin radio-pérkal pou arpran le bobar tèl k’i lé, pou souf sa dann zorèy demoun, banna noré pa téléfone bann radio pou dir ninport de koi ; lo bann radio nora pa difiz lo nouvèl, nora évit sali demoun.

Dizon, lartik zournal-la, la mèt an marsh tout in mashine : la pa vann papié simpleman, la fane la mansonjri dan tout la popilassion !

Justin