Oté

Noël in bon tan ! Kèl bon tan mondyé ségnèr ? A bon ! Sak lé pa kontan li na ka pran konstan

Justin / 26 désanm 2018

JPEG - 43.6 ko

Si zot lé jenn mi pans zot i koné pa ditou koman téi éspas in noël dann tan d’avan. Moin pèrsonèl, mi rapèl koman sa té i éspas san dantèl épi san konplikasyon. Vakans ti tonm 23 désanm é 24 lété la vèye Noêl. Lo tan d’alé la mès lo soir si l’avé la mès pars mi rapèl dann tan-la, dann mon vilaz l’égliz lété kasé dopi moi d’févriyé é moi d’désanm laté pankor réparé.

Nou va anparl de sa in n’ot foi, pou l’instan, ni diskite dsi noël lontan : 24 o soir apré diné nou téi sava dormi, inn ram marmaye par li épi nou téi atann landomin pou oir si pèr Noël l’avé pasé épi si li l’avé lèss in zouzoute pou nou. In zouzoute, sansa in zoué ? Kékshoz sinp ! Nou té i rode pa lo fyon nou. In sinp toupiy avèk in lign, sansa in pti kanif trann-dé, sansa ankor in poupète shifon. Konm di l’kont sa l’avé asé pou fé nout dimansh.

In zafèr nou l’avé pèr sé d’ramass in fouète dsou nout zoryé pars nou té i antann dir si l’avé pèr Noël, l’avé galman pèr fouétar é i paré-mé moin la pa vi sa !-si ou té pa in bon zanfan bien zantiy é bien obéisan, ou téi pé gingn in fouète é lo fouète lo paran téi ansèrv-dé foi pasé dan la sand !- pou fé lèv roulo dsi out molé. I di sa, é mi répète, mé ozis moin la pa vi sa pou vréman !

Aprésa la zourné téi éspass korèktoman. Téi fo fé kant mèm bann korvé. Konm rode dolo, konm rode la paye pou zanimo mé téi rèss lo tan pou zoué kant mèm é zour-la pou sak i gingn l’avé in méyèr manzé : pa zortolan ! L’avé poin nou sa. In volaye tyé é si par bonèr in moun dann vilaz té i tyé in koshon shak famiy téi ashète in bout é so vyann la, l’avé in bon gou, ou téi manz sa avèk kontantman si posib an lésan la vyann pou la fin pousé dsou l’ri sansa dsou lo mayi.

Noëi té fini. A kan zord’lan ? A kan so bon pèryod dann nout vi ? Pou pli d’van. Sak té i yèm pa, pars l’avé dann tan bonpé marmaye téi yèm pa pèryod-la é ni pé sèye oir pou kosa. Mé pou l’moman alon di sinploman sak la pa kontan ébin li pran konstan.