Moin na konm dan l’idé in bon pé dmoun na pèr dann l’aviyon. Ou i gingn lir sa déssi la figuir déssèrtin. D’ote i fé konm si de riyin n’été, donk ou i pé maziné zot na pa pèr, sansa, konm di d’moun instruiyé, zot pèr lé sou kontrol. Ziska kèl poin... sé solon l’moun. Touléka, kan l’aviyon lé dann tangaj, ou i an apèrsoi in bon pé i shanj figuir. Rozman, nana in pé, gran kozèr, gran konésèr, i asplik na poin danzé. Rozman, sansa malorozman, pars na dé foi ou la anvi dir ali "fèrm son také !".

Mi souvien in foi moin té dann l’aviyon é, toutinkou, lo l’aviyon la mète a tangué. In kou li dsann... l’èr-la, mon léstoma i monte ! In kou li monte konm pou dépas lo syèl... L’èr-la mon léstoma i dsann ! L’èr-la, in gran konésèr i mète a dir i fo pa inkyété, pars lo l’aviyon lé étidyé pou rézis tangaz pli for. Mon dyé ségnèr, akoz boug-la i fèrm pa in pé son boush ? Akoz li la bézoin kozé. Poukoué in dyaré vèrbal konmsa ? Dann mon koin, moin lé fine vni vèr moin la, é pa aryink moin. Toutinkou, la fé in désante pli o-fon, la mète déyèr in monté pli o. In pé la kriyé ! Lo kozèr la ramas son kozman !

Mon dyé ségnèr, é si bann savan la fé in lérèr dann zot kakil... é si zot la tronpé. In pé, moin na doutans, i résite dann zot kèr "zé vou sali mari". Apré i ardoub sa avèk in "notropèr", in "mon dyé zé régrète". In pé i di, si zot la sort la-dan, zot i manz pi la vyann toultan, sansa in koup de tan. Rozman, pou finir, l’aviyon i nyabou sort dann tangaz. Lo konésèr i arkomans kozé, mé li pé kozé éstèr ; Débransh solman in pé son mikro pèrso !

Akoz sa i vien dann mon tète zordi ? Pétète pars la-ba dann Japon, lé riskab ariv in katastrof nikléèr ? Pétète sa i fé pans amoin la route litoral. Pars la ossi nana danzé, é in pé la déside fé so rout-la landroi li lé. Pars méssyé Didier la déside ropous lo shantyé, pou fé soi-dizan in route si voi. Mé si domin, sansa apré, sansa apré-apré ankor, in gran zékay lo rosh mélanzé avèk la tèr i détash... si in gran kantité la tèr i déboul… kossa va di ? kossa va fé ? Sak moin lé sir, nora touzour bann zésplikèr pou éspliké, pou koz la boush rouvèr.

Justin