L’inivèrsité La Rényon, sa na bon kèr. Bon kèr avèk son bann profésèr, konm i di son bann amontrèr-shèrshèr (enseignant-chercheur) ; Oté lé ga ! Mèm si lo boug i travay pa pou in grin, mèm si li fé pa in sèl l’èr lamontraz, i donn ali son gro moné, moi pou moi, é si li fé pa romark ali, pétète ané pou ané. Zot i pans moin l’apré gougnardé la ? Inkyète pa, sak mi di lé vré, é pliské vré. Mi pans mésyé KD i koné in réyon la-dsi.

Fransh vérité, moin té fine lir sa dann in blog i apèl "bonanivèsèrdidier", é moin té apré domandé si in n’afèr konmsa lé fézab, si in n’afèr konmsa i pé arivé. Mésyé KD lé profésèr, mé li lé osi vis-prézidan la Réjyon. Son éstati i done ali la pèrmisyon pou fé in pé moin zèr d’tan k’in moun i travay plin tan, konm amontrèr é konm shèrshèr. Konm amontrèr, si lé z’ot i fé san katrovin douz èr d’tan, li doi fé san-sinkant uit. Mé li doi fé ! D’apré sak lo prézidan l’inivèrsité la di, li la pa travay pou in grin : pa in èr d’tan konm amontrèr, é si li la fé roshèrch, i paré l’avé poin pou gaté non pli.

Mé pétète zot i kroi li travay pou manjé kui, konm in sort travayèr pov. Pétète zot i pans lo boug i kalkil li travay pou la valèr, donk la pa bézoin rode lo pou dann in tète la poin shové. Non va ! Li té i gingn in bon moné. In pé i di li té i gingn uit mil léro. Lo prézidan, pou son par, i di in profésèr konmsa i gingn kat mil sink san l’éro kan li komans, épi son salèr i pé alé ziska uit-mil. Konm mésyé KD lé déza gradé, lé for posib son salèr lé pli pré d’uit mil ké dé kat mil.

L’èr-la, lo prézidan la domann ali fé dann l’ané ki vien bann z’èr l’ané 2010-2011, é sète 2011- 2012. Li la di oui ! Pars dann oui, la poin batay. Li la mèm di, li la fine komansé lo vinn-dé aout. Lé dir komans dann vakans konmsa ! Dovan kisa, vi k’lo vinn-dé aout, sa i tonm dann vakans. Ni arète la zordi, par si paré la pankor fini... noré ankor, d’apré sak i di, an plis ké sa, in zistoir d’kopin é d’kokin.

Justin