Sépa si zot i koné in sèrtin Jadav Payeng ? La pa in gran prézidan ! La pa in gro rishar ! Zis in pti kolon, i viv la-ba dan l’Inn, dan la valé in flèv, mé in pti kolon la fé dé shoz inkroiyab. Koman sa la komansé ? In zour, lo flèv la arzèt dsi in ban la sab in kantité sèrpann lo. Solèy la shofé é tout sèrpan la krévé. Lo boug té dézolé ; li la mazine si l’avé pyéd’boi, la tèr, in pé l’imidité, bann serpan nora pa krévé.

L’èr-la, li la parti oir gouvèrnèr l’androi épi li la domann si li pé plant pyéd’boi. Banna la fé ali pou répons, son tèt la pa bon, pars arien i pous pa dann in ban la sab ; konm li antèt, banna la fini par di ali, plant kalimé banbou si li vé. Lo boug la di : "Lé bon ! Sa mèm mi sava planté !". An pliské sa, li l’amèn fourmi rouz pou èd ali rofé la tèr. Banbou la pous an poundyak, i falé oir. L’èr-la li ropar oir gouvèrnèr, li di lo boug konm de koi banbou la bien pousé. Li domann si li pé plant d’ot kalité pyéd’boi. Konm li antèt, banna i lès ali. Pyéd’boi i pous bien vèy pa koman, avèk bann lyane, bann plant tout kalité : lo van l’aport bann grin, épi zoizo l’aport la somans dan son fyant. La fini par kouv 550 éktar, in foré planté èk son dé min.

Aprésa, tout kalité zanimo an danzé la vni dan foré-la : bann rinoséros, bann tig roiyal, bann z’éléfan, épi d’ot é d’ot ankor ; L’ané 2008, lo minis l’Agrikiltir la antann parl foré-la é li la vni oir. Kroi amoin, li té kroir pa son dé zyé. Mèm lo résponsab bann foré l’arèt bèt. L’èr-la, demoun la vni shèrch manzé dan lo foré ; in pé la fé zot kaz. La vi la arpran lo dési... Astèr-la, bann domoun, bann gro z’animo té i déranj azot, la rod tyé lo bann gro zanimo. Jadav la pas dovan épi li la di, komans par tyé amoin ! Demoun té i vé pa alé ziska-la. Astèr-la, li la asplik lo moun kosa li la fé an trant zané, koman li l’ariv fé pous la foré. Ziska zordi, demoun la lès ali, son foré épi son bann z’animo trankil.

Zot i kroi lo péi la dékor ali, la done ali konm in zarboutan lo patrimoine ? Zot i kroi li sé in éro nasyonal ? Ditou Baya. Kan i parl dé li dann zournal, i di li sé in pèrsonaz insolit. Sré bien si l’avé in bonpé pèrsonaz insolit konm sa ! Mèm isi noré bézoin moun insolit konmsa.

 Justin