Matant Zélida la ékrir Justin :
Mon shèr nové, mon spès salté,
Kan mi oi la popilarité prézidan la Répiblik i dsann konmsa, mi domann amoin pou kosa. Pars d’abitid, nana sak i apèl lo l’éta d’gras. Demoun i fé konfyans lo nouvo prézidan in koup de tan, aprésa i fé pi, i fé moin... touléka, lé suivan lo rézilta la politik lo moun i amèn. So kou isi, avèk François Hollande, sé konm k’i diré na poin l’éta d’gras. I diré demoun i vé ziz ali toutsuit sir pyès é na poin la pasyans atann lo rézilta. La pa zot mèm, bann rouj-de-fon, l’avé di lo prézidan i sava fé dé manda inn déyèr l’ot épi li va gingn lo tan pou bien amèn désèrtin projé ? Mi vé pa anparl bann rouj-de-fon la Frans, mé sèt La Rényon. Na in n’afèr i diré lé pa bon la ! La prèv, kan zot la komans aprouv la politik Sarko dsi lo dévlopman andojèn, é bin lo boug la pran lo fon. Astèr, kan zot i pran parti pou lo nouvo prézidan, ala k’li komans dékaniyé dan l’opinyon demoun. I diré zot i aport la movèz shans. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Mi antann bien sak ou i di, mé mi oi pa pou kosa ou i mèt l’otèr dsi mon parti. Pars dann ka Sarkozy, lé vré, li la fé in bon diskour moi d’novanm 2009, mé li la kontinyé in movèz politik té i tourn le do avèk bann bon parol. Donk, si bann Rényoné la vot kont li, lé pa par nou, mé lé par li-mèm. Astèr, pou lo nouvo prézidan, lé vré, nou la domann vot pou li pou son bann propozisyon é pou son diskour Sin-Lui, é nou lé sir, si li ariv amèn son program kom k’i fo, l’opinyon va ardonn ali favèr. Lé sir, sar pa fasil. Lé sir osi, nana dé shoz ni partaj pa avèk li. Tout fason, sé par lo rézilta ké l’opinyon va jij ali, isi La Rényon, konm la-ba dan la Frans. Li domann dë z’ané pou répar lo déga la droit la fé dépi diz-an. aprésa li nora troiz-an pou fé avans lé shoz. Nou va oir sa, pars nou la zamé signe in shèk an blan pou li. Epi mi pans pa bann Rényoné va rès bra kroizé ankor lontan. Tok ! Pran sa pou ou !

Justin