Dopi dèrnyé siklone somenn pasé, ou i antann d’moun apré jazé dann radyo : i di si ! I di sa ! I di la ! I di si l’avé déklansh l’alèrt rouz noré fé si, noré fé la. D’ot i di, noré pa shanj arien. Mé in pé i trouv kosa pou zot noré shanjé ! Mé l’om la sa sé in n’afèr lé dir pou shanjé.

Alon kalkil in kou ! Si par ébzanp, dann in komine néna in tralé shomin paralèl i sort an o La plène dé kaf pou dsann dan lé ba pétète lé bon pou bann loto mé pou d’lo, lé bon galman pou li, li ansèrv de sa konm si lété son li. Li bour an dsandan é li ral lo blak avèk li. Sa shomin, bann shomin la, la pa la natir la fé sa, lo moun la fé sa é dopi in kantité zénérasyon. Alor sirman la pa in késtyonn z’alèrt !

An pliské sa, moin mi vé pa dolo i rant an bèf dann mon kour donk mi aranz lo baraj ké mi pé pou arfoul dolo dann shomin. Mon voizin fé parèy ! l’ot, l’ot é l’ot i fé parèy galman. Aprésa, kan la plui i tonm an lavalass lotorout dolo i marsh a fon. Di pa si in moun la pa anbar son kour ! La sos lé pou li. Pou li, sansa pou lo bann z’imèb dolo va trouv dsi son shomin.

Astèr si ni rogard la roganizasyonn lo. Tout bann z’ouvriyé i travaye la dan i pé dir anou, nout rézo kaptaz lé pa étidyé pou rézis in siklone. Si li lé pa étidyé sé pars bann sosyété la fé sa, zot la fé konmsi la Rényon sé in péu d’bo tan toultan. Poitan nout tout i koné la pa konmsa é si nout tout i koné pétète i fo prévoir lé shoz an konsékans. Mé prévoir sé in n’afèr é fèr sé in n’ot é pandan éstan kabri i manz salad !

Mi arète la pars, an touléka néna in n’afèr mi pans la pa pou arète koméla, sé d’antann parl siklone la. A moins in n’ot siklone i vien vizite anou. San tardé. L’èrla, kréol va gingn manzé tan é tan pou la lang.