Na dé-troi zour nou la parl l’anploi isi La Rényon dann la fonksyon piblik. Nou la di na poinn rézon pou k’i pran in moun déor an plas in moun isi - sirtou kant inn é l’ot nana lo mèm kalifikasyon é k’an plis sat lé isi li koté bien lo tourné-viré nout péi. Nou la di sa pou lo ranplasman in diréktèr l’opital pars i paré sa sé in n’afèr i fé bonpé lo broui.

Par l’fèt, pou kosa sa i fé lo broui ? Mi pans pars nana in bon rézo bann moun i sort déor pou fé gingn z’ot kamarad in bon plas kan na in bon plas k’i prézant. M’a dir azot in zistoir vré : nana dé-troi z’ané d’sa, in jenn fiy i sort La Frans konm psikolog diplomé é shak plas i domann normalman in psikolog li fé son domann. Nana l’antrotien é shak foi èl i trouv pou konkirans aèl bann jenn i sort déor, èl la kroiz azot dan son z’étid… inn-dé la mèm fé z’étid avèk èl. Sa lé vré mèm kan la pankor fé in l’apèl kandidatir.

Apré-sa zot i pans sak i domann la réjyonalizasyon bann z’anploi na tor ? Apré-sa zot i rod tout kalité tèks de loi pou bord demoun nout nasyon ? Moin la fine dir Sarkozy, dann tan li lété prézidan té i di pa ot shoz ke sa. Pou nout par nou la fine domann in moratoir dsi kinz an pou donn kréol travay sir plas é voiyan sak moin la fine oir, konésan sak moin la fine konète, mi pé dir nout parti na rézon san pour san.

NB Sanm pou moin l’anploi dann la fonksyon piblik tèl ké sa i spas zordi i aport son pyèr pou konstui é pou ranfors lo sistèm kolonyal isi La Rényon.

Moratoir : lo moratoir ni propoz i port dsi kinz-an é nana konm poinn vizé dévlop l’anploi bann rényoné sir plas.