Bonzour zot tout ! Zot la fine désid prézant azot zéléksion.Zot i vé ète mèr, ladzoin sansa in sinp konséyé dann in mazorité ou dann lopozision. Zot i vé ète konséyé zénéral, dann in mazorité sansa dann lopozision.
Pou kossa, zot vé in nafèr konmsa ? Si sé pou fé l’intéréssan, pou ète in gran-pti pèrsonaz, i vo mié lèss tonbé. Si zot i vé défann zintéré zot famiy dann séktèr la politik vik zot famiy nana gro-gro larzan épi i fé biznèss, réfléshi azot bien : tan zordi avèk tan domin, la pa parèy. Avan di waï zot lé riskab gingn in sak lo kou ; mi vé dir in rèss trankil avèk bann zéléktèr.
Si zot i vé défann lo zintéré bann rénioné, sa in bon lintansion. Mé solman i fo zot i koné oussa i lé lintéré bann rénioné : la pa ral in koté kan in n’ot va ral l’otkoté. Sé lo méyèr manièr fé kapote sharète dan la kivète.Akoz, mi di sa ? Akoz lo tan k’i vien lé riskab ète dir. La Rénion nana si tèlman problèm. Bann péi loséan indien nana si tèlman problèm galman. Le mond l’apré shanz an katrièm vitès dovan nout zié.
I fo konprann lé shoz pou transform azot, bien konète lé shoz pou transform azot an bien. Lé pli sérié zordi k’yèr : nou la si tèlman fine pèrd lo tan.

Justin