Nou lé ankor dan l’oséan Indyen ? Ni plane si in n’ot planèt ou koué !?

18 séptanm 2013, sanm Justin

Zot i rapèl ke nout minis l’Outremèr in zour noré di ke li trouv ke l’akèy Rényoné i fé a lu kan lu vyin isi lé pa toutafé sak lu devré atann an tan ke minis.

Bon, lu lé d’orizine antiyèz ; donk lu devré byin konèt nout problématik, minm si nou lé pa dan le minm oséan ; a lu dan l’atlantik, a nou dan l’ndyen.

La i vyin nonm in madam ambasadris pou lé péi voizin de La Rényon dan l’oséan Indyen ; la madam lé mèr inn vil i apèl Charlevilles Mézières an Frans ; èl va rès mèr. La pa trouv in persone ki touch a nou in pé pli pré ?

Nou l’avé in Wilfrid Bertile, dizon sé li ke la fondé le parti sosyalis isi (mi rapèl ke le gouvernman aktyèl lé sosyalis) ; lu la été dé z’ané sécrétèr Comisyon d’l’oséan Indyen (COI), nout l’intèrlokitèr rézyonal po alé rankont gouvèrnman malgas, sésélwa, morisyin. Zordi li la pu bon ? Son kandidatir, zot i rofiz ?

Oté ! ou sa nou sava ?

Mi rapèl, zèn normalyin, dan lé z’ané 1965, nout promosyon té sar inn voyaz Kénya. Nout diréktèr i fé kal a nou dé-troi zour l’Ecole Normale Tananarive ; a nou, fitir z’ansényan kréol, nou établi prozé z’ésanz èk nout z’ami malgas ; nou la vi osi fitir z’instititèr Madagaskar ni Sin-Dni Bèlpyèr…

A koz tou sa là la arété ? Oté ! mi trouv nou la koup tro lé pon. Tanka nout désandans, lé ankor plis a plinn. Koman fèr ? Mi pans nou doi prann (ou roprann) so problèm i apèl « relations extérieures » èk tout nou bann voizin in maniyèr pli séryé.

Nou lé ankor dan l’oséan Indyen sinon nou plane si in n’ot planèt ?

Justin


Signaler un contenu

Inn modékri, inn ti lavi, inn komantèr ?

Bann modékri andann forom

  • allé savoir ce que le governement la po fé, band zardenais y conné que soleil y couche 16h là bas mais problèm par ici, va être compliqué po li


Témoignages - 80e année


+ Lus