Mézami, souvan mi mazine dann tou mal néna in bien : pou nou zordi, lo mal sé la tablatir nou lé d’dan-par l’fète lé dé tablatir, la kovid épi la dengue. Ni fé zamé lé shoz a moityé nou ! lo bien sé kan i done anou lokazyon pran konsyans shomin nou la pri, i pé pa amène anou bien loin dann in bonpé d’sanss.

Dabor nou la vi gouvèrnman fransé oussa li lé-tro loin par raport anou, mèm in pé kontre nou - i pé pa pran lé bone désizyon pou pèrmète anou défand anou kont la maladi. Rouv l’aéropor san limite épi san kontrol lété pa in n’afèr a fère é poitan léta lokal la fé. Lèss moustik tigr sak i répande la dengue san atak ali avèk bann mézir apropriyé lété pa in bon solisyon : lété pa in bon solisyon d’fé konmsi la dengue lété in pti maladi vényèl.

Kossa nou noré fé nou ? In bonpé rényoné, nonbril antéré issi, la fine dir é rodir sak téi falé fère, mé sirtou sak téi falé pa fère… é sirtou pa fé porte lotèr dsi nou, dsi nou rényoné. La lésson ni pé tir ladan lé sinp mé i obliz fé in gran shanjman : i fo in pouvoir politik rényoné for pou fère fass lo pouvoir d’éta é sète bann téknokrate épi galman bann lobby touristik é d’ote. Si nou l’avé sa, nou noré pa trouv anou dann in voi san issu konm sète nou lé d’dan.

Mé la pa solman dann domène la santé ni doi intéroz anou é dann la mèm diréksyon ké nou la vi anlèr-la. Kan in pé i di nou lé dann in lékonomi avèk la kroissans san dévlopman, zordi ni pé mézire lo danzé in pé la mète anou d’dan. Nou na poin lotonomi dann l’énèrji, nou la poin lotonomi alimantèr, noute lékonomi la santé i bate l’èle. Nout patrimoine la biodivèrsité lé pa mi an valèr - noute lédikasyon i mouline anplass san amène anou landroi k’i fo.

Zordi mi arète la, mé mi lans kant mèm in apèl pou ké bann rényoné, nout band frèr é sèr, noute nasyon i réfléshi dann kèl sistyasion ni lé é i kalkil koman ni pé fé pou shanj shomin vi k’lo shomin nou lé d’dan sé in voi san issu. Kissa i komand nout péi pou lo pli inportan, lo pli déssizif, lo pli néssésèr ? La pa nou é sé sa lorijine lo mal nou l’apré soufèr.