Mézami, zézolinpik i sava fini é shakinn i tire déza son konklizyon : li vo sak li vo, mé sak lé sir sé k’in zézolinpik san piblik sé in drol dé zé. Sak lé sir sé ké lo zézolinpike sé in gran spéktak mé kan li na poin piblik éskize mon pardon ala in drol éspéktak. In pé va dir vi k’néna la télé épi li anvoye son bandezimaz in pé partou, sa i ranplass lo piblik. Zot i pé panss sak zot i vé, mé mwin pèrsonèl mwin la zamé panss la télé la zamé ranplass lo piblik.

Astèr mi antan in pé apré di, La Rényon la mète ali anlèr dann zézolinpik sète ané. Lé vré néna dé rézilta i bote anou, sa lé sir é déssèrtin jenn rényoné la fé bande bon rézilta, é ni san nou lé flaté, é sa lé bien normal. Lo mérite i arvien pa d’nou mé i vien d’bande zatlète zot mèm, épi zote fédérassion la bien travaye avèk zot. Kissoi bande zidoka, kissoi bande handball, bande sikliss, volleyball épi d’ote spor ankor.

Astèr ni pé domande anou si La franss i tire toute lo méyèr possib son bande sitoiyin l’outre-mer. Ni pé domande anou si lo métode pratiké par lo milyé sportif par rapor bande téritoir l’outremèr sé in bone méthode. Si par ébzanpe téi fo pa in bone baz lo bande spor dann shak téritoir l’outre-mèr avan légzode noute bande jenn zatlète. Mi panss sa lé vré pou léspor, mé vré galman dann d’ote séktèr… Mi panss sa sé in vré déba é in zour sansa l’ote i fodra bien amenn déba-la.

Alon pa fé lo pti boush pou linstan, déssèrtin jenn rényoné la fé bon rézilta, zot famiye, zote kamarade épi nou mèm nou lé kontan avèk zot rézilta… Tan myé, mé lobligassion alé déor pou toute é dann toute lé ka, ni pé domandé si in politik konmsa la pa lèss in bonpé jenn La Rényon épi lé zot téritoir l’outre-mèr dsi l’karo konm i di. An aiandan bravo pou noute zénèss la bien réissi.