Mé zami, moin lé sir zot i sava pans moin sé in konplotis. Dabor kosa k’i lé sa ? Mi pans sé kan bann moun opozé lo gouvèrnman i akiz lo sète-la pran éksopré bann désizyon pou mal fé alé lé shoz. Mo-la, i sort l’amérik, dann in tan lo gouvèrnman téi akiz sak téi krétik ali d’ète partizan la téori lo konplo.

Donk, si i sava rode dann tout sak moin la di, épi dann tout sak moin la ékri i krétik bann gouvèrnman, bann préfé, bann prézidan bann koléktivité, moin lé sir k’in léspri tort lé riskab trouv mi pass mon tan à rode bann konplo partou pou di é pou ékri si i pran bann mové désizyon la pa par érèr mé par konplo.

Ni pé pran in bonpé légzanp dopi dé zané mi suiv la vi politik mon péi. Ni pé pran in sèl problèm pou oir si sé lopinyon in konplotis : alon pran la COI. Si mi krétik gouvèrnman fransé kan li la bord La Rényon, kan li la mète La Rényon a l’ékar pou pran nout plas konm lo koukou kan i pran lo ni lé zot zoizo. In l’érèr ? In mové shoi ? Sansa in konplo ? In mové shoi pars i sava an sans kontrèr nout lintéré rényoné pou in bon l’inplantasyon dann loséan in dien.

Dann tousala, nou lé pa pou la téori d’lo konplo. Nou la zamé di gouvèrnman la konplote kont nou mé li la bar nout shomin pars sa i fé parti son programm néokolonyalis. La pa pars ni domann pou alé dann sans nout lotonomi é ké gouvèrnman i anbar nout shomin ké nou lé konplotist... Dann bonpé gran désizyon lé konmsa é si ni di, la pa pars nou lé konplotist mé sinploman pars i sava kont nout lintéré vital.

Nou lé pa konplotist mé nou lé kont in bonpé désizyon gouvèrnman la pran pars li oi son lintéré puisans néokolonyal é nou ni oi nout lintéré rényoné é ni vé ni vé pa, lé dé i koinsid pa.