Lé ga, alon fé in sipozisyon. Dizon ni travaye dann bitasyon in blan. Ni travaye dir pars avèk blan i grate pa l’gongon. Astèr alon majine samdi sé lo zour la pèye é lo kolonm i pèye anou kisoi par raport lo tonaz kann nou la koupé-sharjé, kisoi par lo nonm golète nou la graté, kisoi ankor pou tout sak nou la fé a la syèr mon fron dann in somenn. Li di anou : intèl ala out larzan, intèl ala la vote, voiro ala la tyène, souingi ala pou toué, madam Néné ala pou ou, Dédète ala sak i doi aou.. Mète zot doi dann l’ank épi apiye sa dsi lo liv kont an giz signatir.

Astèr fini la romans larzan é li di Intèl ou i doi tan la boutik bitasyon, mi tir dsi out pèye, konm mi tir dsi la pèye intèl, dsi la pèye voiri, souingi, épi madam Néné, épi ankor Dédète. Sak i rèss lé azot. Solman la boutik la gingn in éstok savon é moin l’amenn pou zot pran : la poin pou tortiyé. Arzout èk sa sounouk l’arivé épar zantiyèss moin l’amenn in pé pou shakinn é mèm si lé shèr zot la gingn zot par… Lo ta larzan shakinn i dégrinn firamézir, i diminyé. Mi di pa zot koman zot i fé la mine la !

Intèl i pans dann son kèr son madam l’avé l’intansyon ashté in koupon pou fé in rob pou èl épi pou sa grann fiy : manké pou somenn isi ! Intèl i pans son madam l’avé bézoin in konbinézon mé sète-la osi lé manké. Madam Néné l’avé bézoin in nap, èl va s’anpasé. Tanka Dédète èl té fatigé marsh an langouti é èl l’avé anvi fé in pé la bèl pou son mari : fouti osi ! Parèye pou voiro é son projé lé a lo. Parèye pou souingi, larzan métrèss la pi somenn isi. Astèr-la, manj la raz an silans pars sansa lo blan i foute aou déor. Ousa ou valé ? Na poin l’androi pou alé.

Mon bann dalon, pou kosa mi di sa ? Pars in tan té konmsa. Pars zordi ankor nout péi lé konmsa. Larzan l’érop sé l’érop ki komann. Ou i pé pa fé sak ou i pans i fo fèr. Ou i fé sak l’érop i pans ou i doi fèr. Ou néna in vézikil é sé pa ou k’i aminn ali, sé mèm pa ou ki désid l’androi ou i doi alé. Konsèye départmantal parèy : gouvèrnman la mète in kantité dépans obligatoir é sé li ki désid kèl dépans lé obligatoir. Aou, i rèss aou inn-dé klopinète pou dépansé é sé pa ou ki désid kosa i fé pa pou lo prinsipal, mé pou sak lé sogondèr, la ké laba.

Alor, mi domann si nou lé résponsab de nou dann dé ka konmsa é mon konklizyon sé non dann dé ka konmsa nou lé pa mète de nou é nou la poin pou avans konm ki fo. Nou lé néokolonizé, in poin sé tou. Nou lé pa adit, touzis si nou lé pa ankor zanfan tann.