Matant Zélida la ékrir justin :
Mon shèr nové, mon spès salté,
M’a dir aou in n’afèr : mi konpran pa kosa bann rouj-de-fon nana pou mèl zot né dan la politik métropol. Si zot lété Parti kominis fransé, moin nora konpri zot i apiy lo rin lo kandida lo PCF. Mé zot lé pa PCF, l’èr-la mi konpran pa pou kosa zot i prétan done dé z’ord lo parti d’la-ba épi son kandida Fronn-gosh. Sanm pou moin, sé lo kandida épi son bann dalon i fé son program. Si i plé lo PCR, tan myé pou li ! Si li lé pa kontan, li na k’a pran konstan. Pli pir ankor kan i vé done dé z’ord Parti sosyalis épi son kandida : mèt si, mèt pa sa, mèt sosi, mèt pa sola. Boudikont, banna i doi di, zot i oi pa poukoué ti-péi miniskil-la i rod domine azot. M’a dir aou in n’afèr ! Zot i koné fab La Fontaine "Gronouy avèk bèf" ? Gronouy i vé gonf ali pou trap grosèr lo bèf. Rézilta ? Gronouy la ésplozé. Tok ! Pran sa pou toué !

Justin la fé pou répons :
Mon vyé matant k’i koz touzour la boush rouvèr,
M’a dir aou, fransh vérité, ziska zordi, gouvèrnman fransé la aplik konm li té i vé son politik pou La Rényon épi bann péi l’Outre-mèr. Ziska zordi, li la pa vouli pran l’èr èk nou, pars li pans li koné myé lé shoz ke nou. Tazantan, té i pran in désizyon té i sava in pé dann sans sak nou té i domann, mé pa tro, mé tro tar la plipar d’tan. Donk, zordi, nou l’ariv l’androi nou l’arivé. La pa in késtyonn gronouy, mé sé La Rényon lé près paré pou ésplozé. Si so kou isi, i pran pa sak lé marké dan nout plan, malèr pou nou. Pou koué ? Pars nou la fé in bon plan pou nout dévlopman dirab, mé galman pou fèr fas l’irzans. Donk ni obli pa prévoir l’avnir é okip lo prézan. Nou ki ? Nou Parti kominis rényoné, pa lé zot, k’i kont solman dsi baton tonton pou travèrs la rivyèr. Matant, nou lé pou lo dévlopman andojène, bien apliké, pars sé sa i pé sov anou ; biensir nou lé pa pou lo D.A.O solon Sarkozy, lo Démèrd-a-ou. Tok pran sa pou ou !

Justin