Mé zami si mi diré azot néna kékshoz mi gingn pa siporté. Sé koué ? Sé kan mi oi désèrtin apré fatig azot pou rotrouv lo tan d’avan. Pou kosa mi di sa ? Pars mi di épi mi rodi, in pé la fé kroir anou lo tan d’apré lo kovid, sar pa ditou parèye ké lo tan d’avan. Zot va dir amoin sé pa promyé foi mi di sa, é sa i amenn amoin ousa ? É zot sa i amenn azot ousa ?

Tousa i dépann sak ni vé pou nout péi, donk kosa ni vé pou La Rényon. Alor kosa ni vé pi pou La Rényon. Kosa ni vé pi ? Dabor inn l’ord néokolonyal – in paran lo kolbètism konm i di souvan dann nout zoinal. Lo néo kolonyalism l’amenn anou ousa ni lé zordi avèk nout maldévlopman, avèk nout shomaj, avèk la povrété, épi bann zinégalité pli pir ké sak nou la koni dopi touzour, avèk an plis bann zatak kont nout l’anvironeman, é anplis ké sa, d’ot ké nou pou gouvèrn nout péi.

Mi pans mon kamarad Lulu é kan li di : kisa i gouvèrn nout péi ? La pa nou pou vréman. Nou na poin lo pouvoir pou vréman sansa in pouvoir kassé an morso, in pouvoir par shikète é kan ni trouv in n’afèr bon pou nou ni kroiz dsi nout shomin in bann pozèr l’anspèk, in bann anpéshèr travaye konm i fo, in bann l’anpéshèr produir konm i fo, pou trap in dévlopman korèk pa sak ni oi dovan nout zyé isi La Rényon.

Alor médam é mésyé bann révèr lo tan d’avan i rovien, antansyon ! Antansyon si ni koné pa ousa ni vé alé ! lo tan nouvo la pa pou arivé pars in sharjèr d’lo la di ! Lo tan ansien lé pou rotourné avèk tout son bann tablatir é kosa ni sava fé si ni koné pa nou mèm sak ni vé ? Pou moin i fo ni pran lo tan pou konète sak ni vé pou nout péi, tout sak ni vé pou nout péi. San présipitasyon ! Demoun lé présé ?ébin alon pran nout tan konm Lénine téi di.