Moin la anfin antandu mon kandida o zéléksyon éropéèn kozé ; kanpagn ofisièl fine komansé.
Li roprézant linion bann zoutrémèr ; in moman li anons li va parl in nafèr persone la pokor di ; lé vré si oui di po amélior kondisyon sosial, sitiasyon ékonomik, fé disparèt somaz tou sa la, toulmoun i pé dir sa ; i apèl sa kozé po kozé.

Li té fine ekspozé ke la plipar kandida i atann lord an Frans ; a li li rann kont la popilasyon ; li na po rann kont lo pèp dé zoutrémèr sé tou.
Sof la Guyane, tout téritoir outrémèr sé d’zil ; é lé vré, nou na tandans pans ké nou lé pti ; pti pars nou lé limité par la mèr, la kot, konm la Rényon, nou fé lo tour konplé, nou artonm si lo minm poin ; dizon nou pé konsidéré nou lé konm in nours an kaz, ou sinon in goril, ni tourn dan nout lanklo, ni réss la minm ; nou lé insilèr !

An plis tout bann gran péi kontinan konm Roumani, Almagn, Pologn i pran nou po konféti (sa in lékspresion Giscard D’Estaing).
Bin non nou la pa pti ; pars ogard osi loséan i antour a nou ; é zot i koné koman dan la mèr nana risès ?
Pa riink poison ; zanimo la pokor dékouv tout, télman nana kalité ; rogard kan volkan la dsann o fon na pa lontan 2006 ou 2007 ; na kalité kristasé la romonté mor, nou lavé zamé vi.
Nana minéré, nana pétrol.

In téritoir konm la Polinézi lé osi gran ké Lérop ; si ou mèt inn il si Oslo (Norvèz), oui trouv inn Gibraltar (Espagne), lot Moskou (Russie) ; 3 zour d bato ; ziska lèr lé an dékalaz ant Markiz ék Taiti…
Lérop na la sans avoir in léspas maritime osi gran, li dovré réspèk a nou ; fé lé rosèrs konm li la fé dan léspas o XXém sièk ; alon investi otan dan loséan o XXI ém.
Nou lé pti mé nou lé gran.

Justin