Mézami, La Rényon sé in pti péi : dir sa la pa invante la poude a kanon mé pétète si ni mète in n’afèr konmsa bien dann noute tète, sa pé pèrmète anou tire lo méyère parti lo téritoire pou lo gran bien son band zabitan.

Astèr alon mazine in pé lagrikiltir : isi i pé plante kafé, mé si wi sava plante kafé kalité ordinèr wi pèrde out tan pars vitman-vitman la konkirans lé riskab tyé aou. Mé si wi trouv in kafé bon kalité sipère ékstra, konm kafé bourbon pointi, ou lé sir sa in kafé néna arienk li lé konmsa dsi la tère é si wi plante sa, avèk toute lo garanti k’i fo ébin sar difisil pou bate aou atèr.

Lé vré pou lo thé, lé vré galman pou jèrniome, lé vré ankor pou kakao pars koméla i komanss an avoir bon kalité kakao issi La Rényon é si i kontinyé travaye lo kalité épi lo fasson prépar lo bann fève épi la pate shokola, néna poinn rézon ké bann proditèr rényoné i pé pa défann azot bin dann kréno-la.

Alor, soi wi baz dsi késhoz natirèlman rar, soi wi done ali lo pti pliss k’i rand ali rar épi roshèrché. Dann in ka konmsa la roshèrch i pé pèrmète aou amélyor out produi é fé in sorte demoun i travaye ladan, i pé défand zot sèktèr.

Zistoman nou néna ossi la vaniy é lo produi nou l’avé néna kékzané la pi ditou parèye lo produi nou néna koméla. A ! biensir fitintan rozman Edmond Albius, marmaye douzan dann tan-la, la nyabou fé la fékondasyon artifisyèl la vaniye, rozman ossi bann rényoné la trouv lo prosédé pou prépar la vanille. Mé dopi tan-la plizyèr plantèr avèk zot laboratoir la nyabou amélyor lo produi si tèlman ké dann bann gran réstoranl’érop i aprésyé nout vaniye, kissoi la vanille blé, kissoi d’ote kalité préparasyon.

Mi arète tèrla pou zordi, sinploman pou dir nou lé pti dakor, mé noute natir néna son bon sogré, é noute tète anou i konète travayé. Ala pou kossa, la pa zordi pa domin, mé nou va nyabou ansorte anou - nou va nyabou tire toute lanspèk i anpèsh anou avansé.