Yèr l’été zour d-l’an tamoul : in grann fète pou tout bann tamoul partou dsi la tèr. Inn grann fète, galman pou bann rényoné tamoul épi bann rényoné sak i san zot nana konm in gatir l’amityé avèk bann tamoul partou ousa zot i lé… in bon l’okazyon pou réfléshi in pé dsi la déstiné bann rényoné z’ot vyé famiy la sort dann l’Inn pou vni shé nou.

Dabor i fo ni koné la pa bann tamoul an parmi sak té pli rish ké la vni La Rényon. An kontrèr té sak lété pli pov : zordi i diré bann migran par la fors, par la malis, par la nésésité. Moin lé sir la promète azot dékrosh la line avèk lo dan, amenn in bone vi, dann in péi d’kokagn, pou armas l’arzan é pou rotourn shé zot pou rokomans z’ot vi dann z’ot péi an parmi z’ot famiy.

Pars zot la vni isi par kontra é lété prévi ké zot i rotourn shé zot avèk z’ot pékil kan z’ot tan té i sar fine fé. Mé l’angazis lé mantèr épi é la di azot rès pars l’avé poin l’arzan pou péyé. Kansa va péyé ? Domin, domin… mé zamé l’arzan i vien é kontra dsi kontra zot téi rès isi. Arzout èk sa kan zot i sava port plint avèk lo konsil bann z’anglé téi di bann z’angajé i sort l’Inn, i èm pléré pou arien-In kozman la travèrs lo tan ziska zordi si mi tronp pa .

Solman zot lété pa rogarda é zot l’amenn isi in bonp z’afèr nout patrimoine rényoné : kisoi la rolijyon, kisoi la mizik, kisoi bann zistoir é bann lézann, kisoi la kuizine. Marsh dann fé sa in gran z’afèr pou nou ziska zordi. Z’ot transpirasyon la fé pous karo kann, la fé tourn l’izine, partou la antann z’ot tanbour… nou la pran z’ot zépis, z’ot tizane, z’ot plant médikaman, mèm konm di lo kont zot la rogard pou nou kisoi dann la sann, kisoi dann kart, kisoi ankor dann d’ot z’afèr.

Nou lé rokonésan : bone ané 5117 zot tout ! bone ané 5117 nout tout !