Matant Zélida la ékrir Justin :
Mon shèr nové, mon spès salté,
Alor, konmsa, bann rouj de fon l’avé déside karsèr nout kultur, mète ali dann kaj ? Lété sa lo Mézon bann sivilizasyon alor ? In prizon pou nou ! In spès boite konsèrv pou anfèrm nout kultur dédan ! Tansyon, la pa moin k’i di sa, sé Didyé, lo prézidan. Lé pa n’inporte de ki, lé pa la moityé d’in kouyon siouplé. La, la débisk azot… la, la rouv lo zyé kréol déssi sak zot i pans pou vréman ! Tok, pran sa pou toi !

Justin la fé pou répons :
Mon vyé matant k’i koz touzour la boush rouvèr,
Si mi konprann byin lo prézidan, i fo pa fé bann mizé pars sé in manyèr pou anfèrm la kultur vivan. Poitan, dann mizé, i pé aprann listoir in péi, i pé aprann a konète in sivilizasson, i pé konpar yèr avèk koméla, épi prévoir domin. I ansèrv de riyin sa ? Mé, boudikont, lé pa bon anparl in n’afèr san konète, pars la MCUR sé in manyèr rakonte listoir, épi noute shomin k’i amène ziska nout l’inité. Sé in manyèr anparl nout zansète épi z’ot rasine, san fé proférans rant lé z’in épi lé z’ot. Sé in mizé vivan zamé fini... Somanké, Didyé Robert i pans ni mérite pa sa : lé z’ot pèp, lé z’ote péi oui. Nou non ! Nou lé tro kaniki pétète ?

Justin