Mi vé pa égzazéré, mi dir arpa sé in sèl konvérsasyon dan la boush domoun tansi, mé in vré sizé y rovyin tanzaot kan nou lé anparmi, kan ni an diskit. Konm i tonm si la fin d’lané é konm dabitid pou prépar zour d’lan, pou fé plézir la boush touzour shakinn i atann boush anfariné d’si bishik. Bishik la roz konm i di. Alorss in késtyon, nora ousinonsa nora pwin bishik sèt ané ? I mont, i mont arpa ? Pa bozwin késtionn a nou tro, dopi lontan ni koné néna dé mwin zan mwin bishik firamézir. Poukoué ? Ni koz antronou, pétèt mi tronp a mwin osi, mé pou mwin sé sirman, antrot lo klima ki konvyin pi tro, sanm pou mwin, o plis i fé sho, o plis na pwin bishik, mé pa solman. Lé pa fasil fé konprann in moun ké néna in rapor rant lo réshofman klimatik èk bishik. Ou pé pass pou in tinbré konm sa. Koman ésplik domoun, o plis néna klimatisèr, mwin néna bishik ?

Inn la di a mwin, kan ou koz konm sa, mi wa pa tro la lozik, ou lé konm in boug i arèt sin pièr é pou alé sin dni li pass par silaoss. Kiswa ou lé mavouz ou kiswa ou po kass lé kui, i pé pa mont inn kont lot, bishik sé bishik, klimatisèr sé klimatisèr, ésèy fé konprann a li boudikont, pou byin konprann in nafèr, souvan-dé-fwa fo kass kontour, alé dirèktoman o bi lé pa pli méyèr pou désertin. Pa ryink pou bishik lé valab, pou bokou d’shoz, pwason osi, avan navé bon pé pwason si bor d’lo, zordi i fo alé lwin kan néna. Gèp, tanm-ti nou té sava rod gèp, in morso gouny, in bout do bwa, la fimé o bout, inn ti néstan té gingn in fritir. Shovrèt, marmay nout tan, ki la pa koni shovrèt la ravinn ? té provyin momon, prépar zépis, lo tan alé, dé p’ti kou gouny, kiswa in rougay, kiswa in soss, dan la tant.

Néna bokou la pa koni tan la. Lavé d’lo an kantité, la ravinn té i koul tout lané. Zordi, koman fé pou kontinié fé bav domoun èk nout bishik la roz ? Mi diré nou dwa véyé nou minm, ni dwa protéz plis nout planèt, pa tro takinn nout lanvironman otroman, si ni fé ryin na war disparèt tout, boudikont si ni kontinié konm sa, nou minm ni krèz nout tonm.