La zourné la komans par in s’abat koz ente kamarade dessi l’évolission lé o, son bann bon ek mové poin. Koman protèz son l’environeman, koman trouve travay sans tro détruit la natir, koman fé fass ek la spékilassion fonsié, à la in pé toute défis zot nana pou rézoud.

Aprè manzé, lo propriétèr la monte à nou la distilassion. Li la rapel à nou koman sa la fé la Rissès plantèr lé o, la Rissès nout péï. Tou sa la fini. Lé si tan pli fassil asté déor, plito fé in travay dir konm sa, mêm si li na son pesant d’or kom i di.

Lo moman tout le moune la apréssié sé lo ropa midi. Toute té bon, mé sirtou té fé ek produi péï, La tab té garni konm in zour d’fèt. Navé lo salad flèr banane, pti kanapé, lo gratin tron banane, le pizza patate miel, lo kari baba fig,… é pou fini, en desser la donn la glas ke lé fé dann le villaz. Té vréman trè bon. Lo gou oté !

Nou la vi ke nou pé fé in zoli tab de fèt ek sat nana dann nout péï. Nou fé pa pitié, y fo avoir limazinassion pou itiliz sat nana sou la min é ki Kout pa sèr. Issi nou na in takon zafer pou nouri nout pèp, nou na in zalor sou la min mé fo konèt manié, épi y fo en avoir la volonté ossi. Ti pa, ti pa va fini par arrivé, lo zour nou lé gabié pou mèt en lèr nout prop Rissès.

Ni artrouv.

Justin