Matant Zélida la ékrir Justin :

Mon shèr nové, mon spès salté, rouj-de - fon dovan l’étèrnité, moin té fini par kroir zot té dakor avèk lo prinsip dé l’égalité réèl. Pou kosa ? Par la manyèr zot la fé z’étid la dsi, zot la anvoy mésaz mésyé Lurèl, é zot la pa mank romont lo brotèl madanm Erika. Moin té i pans mèm, in momandoné, sa lété in révolisyon osi in portan ké la loi d’ mil nèf san karann-sis. Zordi, mi romark zot la fine komans pran in viraj-lo déviraj dé sak i rod shap avèk la mas. Si sé sa i fo di ! konmsa nou sar pi tousèl pou mète prozé-la, dann la poubèl. Tok ! Pran sa pou toi !

Justin la fé pou répons !

Mon vyé matant k’i koz touzour la boush rouvèr ; mi oi pa pou kosa ou i di sé nou k’la konm in l’anvi d’shap avèk lo l’égalité réèl. Alé oir sé lo bann moun la lans lo prozé d’galité réèl ké l’apré sort dann z’ot rail. Vi konpran matant, pou nou la loi 1946 sé in loi d’l’égalité. L’èr-la kant nou la antann sé mésyé Hollande k’i vé l’égalité réèl nou la pans, ni pé pa mont dsi la montagn épi agard bann tigr sobate dan la plène. Pou nou sa té konm in moiyin pou fé ratrap lo l’égzagone par l’outro-mèr. Té konm in moiyin pou mète anou dann shomin lo dévlopman… Sé pou sa ké nou la di i fo avèy gouvèrnman-la konm lé dsi l’ fé é nou va avèy ali. Tok ! Pran sa pou ou !