Oté

« Nou néna dë zorèye mé in sèl boush, la pa pou arien »

In kozman pou la route

Justin / 9 mars 2021

JPEG - 43.6 ko

Mézami, méssyé, médam, la sosyété, mwin lé sir zot i koné kozman-la kissoi zot lé rényoné, kissoi zot i sorte in pé dann toute kontré. Pou mon par mwin la trouv kozman-la in pé dann toute provèrbe néna dann in pé toute péi épi lé konu par in pé toute nassyon. Issi La rényon i di sa, plito mi diré konm in linvitasyon : linvitasyon ékouté avann kozé. Kossa sa i vé dir ? Lé sinp, é pa konpliké, i di aou sinploman « koz in pé moins », « ékoute in pé pliss ». Lé fasil dir, mé lé pa fasil fèr pars défoi la lang i grate é ou lé préssé donn oute lopinyon, épi galman fé savoir wi pans pa konm la pèrsone i koz avèk ou. Mé koman ou va konète sak la pèrsone i koz avèk ou i panss, si wi pran pa lo tan pou ékoute ali. Mé lé sir lé pa si fassil ké sa ! Nou na ka rogarde demoun dann shomin : néna inn i asplik, i asplik, é l’ote i fé sanblan k’li ékoute, k’li ékoute mèm si tazantan ou néna dan lidé latansyon la pèrsone la fine shape lo maye… Alor, mi kite azot rofléshi la dsi épi konfronte sa avèk zot prop léspèryanss. Ni artrouv pli d’van. Sipétadyé.