Néna poin lontan dsi bann rézo facebook, moin la lir in nouvèl té i sort dann Témoignages é té i port dsi in konférans parti kominis é téi port dsi la résponsabilité é sak solon moin i doizète lo kèr d’lite sak i vé vréman shanj lé shoz isi La Rényon. Nou la fine anparl sa mé zordi mi vé anparl kékshoz moin la lir dann rézo sosyal.

In moun la ékri kékshoz konmsa. Pou kosa zot la pa fé sa kan zot lété o pouvoir ? Ala in késtyon ni pé dir demoun i pé poz azot pou vréman sirtou bann militan… Pou kosa Paul Vergès la pa aplik sa kan li lété kou dsi kou plizyèr foi prézidan La réjyon. Pou kosa bann konséyé zénéral kominis la pa aplik sa kan zot lété dann bann majorité konsèy zénéral. Pou kosa bann mèr kominis la pa fé si, la paf é sa ?

Konm in vyé profésèr matématik téi di : poz la késtyon, sé trouv la répons. Kèl kalité pouvoir konsèye réjyonal l’ avé épi néna ankor ? Kèl pouvoir konsèye zénéral l’avé épi néna ankor ? Kèl pouvoir bann mèr l’avé épi néna ankor ? Sirman pa sifizaman lo pouvoir pou diriz par nou mèm nout prop zafèr pars sé in réform konstitisyonèl i pé pèrmète anou an avoir lo pouvoir k’i fo pou gouvèrn anou par nou mèm.

Final de kont koméla ni pé fé désèrtènn shoz dann konsèye réjyonal, dann konsèye zénéral, dann bann kominé étsétéra étsétéra, mé nou na poin lo pouvoir pou z’ète résponsab de nou, lite kont lo pouvoir néokolonyal, épi roganiz nout dévlopman pou vréman. Final de kont, zordi ankor nou néna in pé lo fèr dann pyé, kékpar nou lé ankor in pé anklavé… avèk nout konsantman malérèzman mèm si ni koné tèl ke sé ni pé pa ansort anou pou vréman.

Nou néna désèrtin pouvoir sa lé vré, mé lo pouvoir k’i fo nou na poin. Ala in konba bann nouvo zénérasyon i doi améné pou nou gingn sort dann fénoir.