I paré laba, dann Mayotte néna in pé i falsifyé listoir lo péi pou goumante lo santiman pro-franssé an parmi bann maoré. Zot i prétan dopi l’ané 1841 donk dopi lo komansman mèm, bann maoré té i vé vni franssé.

Biensir sa t’in bob sa, in fasson sharj delo, in fasson falsifyé listoir, in mansonz konm néna bonpé, épi in trafikotaz. Mé alon pa obliye kékshoz : shomin nou la pass dodan, souvan défoi an maronaz, pou fé rokonète noute listoir anou pèp Rényoné.

Mi rapèl kan in pé téi vé déguiz lo vin déssanm an fète létchi. Mi souvien bien té pa si fassil désside lo gouvèrnman pou fé avèk lo vin déssanm in zour fèryé é zordi nou la pa gingn fé réspèk sa é sé plizanpliss in zour komèrssyal.

Mézami alon poz késtyon d’moune dsi noute listoir, nou sar prèss pa déssu é poitan ni di in pèp i koné pa son listoir sé in pép paré pou pèrde son rassine. Zordi ankor mi domann an mwin mèm si toute travaye nou la fé an maronaz, zordi la pa apré éfassé.

Alon révèye in kou mézami é sirtou alon pa lèss listoir rante la min bann zélite, anplisské sa rante bann zofissyèl — i fo noute pèp i vanz pou sa.

A bon antandèr, salu !

Justin